24 აპრილს, გამთენიისას, რუსეთმა შეტევა განახორციელა უკრაინის დედაქალაქზე. პირველადი მონაცემებით, ცნობილია, რომ რუსეთის შეტევის შედეგად 9 ადამიანი დაიღუპა და 70-ზე მეტი დაშავდა, მათ შორის ექვსი ბავშვი და ორსული ქალი.
უკრაინული მედიის ცნობით, რუსული რაკეტა კიევში ორსართულიან საცხოვრებელ კორპუსს მოხვდა და დარტყმის შედეგად მთლიანად განადგურდა. ასევე, მნიშვნელოვანი ზიანი მიადგა მიმდებარე ორ სახლს.
დილის 8 საათზე უკრაინელმა მაშველებმა ნანგრევებში მოყოლილი ადამიანის ამოყვანა შეძლეს – ის ცოცხალია.
ოფიციალური კიევის ცნობით, 24 აპრილს, გამთენიისას, რუსეთმა უკრაინაში 215 სხვადასხვა ტიპის რაკეტა და დრონი გაუშვა, მთავარი დარტყმის სამიზნე კიევი იყო, უკრაინის საჰაერო თავდაცვამ 112 საჰაერო სამიზნის ჩამოგდება შეძლო.
ფოტო: უკრაინის საგანგებო სიტუაციების სამსახური
