26 დღეა თემურ ქათამაძე [გაფარ ილმაზი], შსს-ს მიგრაციის დეპარტამენტის დროებითი განთავსების ცენტრში შიმშილობს.
თემურ ქათამაძის ინტერესებს საქართველოს ახალგაზრდა იურისტთა ასოციაცია იცავს. როგორც საიას ადვოკატი მარიამ გაბროშვილი „ბათუმელებს“ ეუბნება, ბათუმის მედროშეს ჯანმრთელობის მდგომარეობის შესახებ სახალხო დამცველის აპარატი ინფორმირებულია და შესაძლოს ის დღეს კლინიკაში გადაიყვანონ.
„გუშინ, 10 თებერვალს, სახალხო დამცველს მიაწოდეს ბატონი თემურის ჯანმრთელობის შესახებ მონაცემები. მისი [თემურ ქათამაძის] სამედიცინო დოკუმენტების გაცნობის შემდეგ გამოიკვეთა გარკვეული სამედიცინო კვლევების ჩატარების აუცილებლობა.
დღეს დროებითი მოთავსების ცენტრში შეხვდება სახალხო დამცველის წარმომადგენელი ბატონ თემურს და მისი თანხმობის შემთხვევაში, გადაიყვანენ სამედიცინო დაწესებულებაში შესაბამისი კვლევების ჩატარების მიზნით.
თუ ჩაუტარდება ეს კვლევები მერე უკვე ამ კვლევების შესაბამისად იქნება გადაწყვეტილება მიღებული საჭიროებს თუ არა დამატებით სამედიცინო დახმარებას,“ – გვითხრა მარიამ გაბროშვილმა.
ვრცლად თემურ ქათამაძის შესახებ ნახეთ ეს სტატია:
კაცი საქართველოს დროშით ბათუმის აქციებიდან – „ჩემი წინაპრები მუჰაჯირები იყვნენ ხინოდან“
ბათუმის პროევროპული აქციების მედროშეს საქართველოდან გაძევება ემუქრება.
თემურ ქათამაძე პოლიციამ ორჯერ დააკავა. პირველად ის 2025 წლის 11 იანვარს დააკავეს ბათუმის პოლიციის სამმართველოსთან აქციაზე, მეორედ კი – 17 იანვარს, იზოლატორიდან გამოსვლისთანავე.
თემურ ქათამაძე ამბობს, რომ ბათუმში დაკავებისას მასზე ბათუმის პოლიციის უფროსმა, ირაკლი დგებუაძემ, 10 პოლიციელთან ერთად იძალადა.
