რუსეთის უსაფრთხოების ფედერალური სამსახურის (ФСБ) დირექტორმა, ალექსანდრე ბორტნიკოვმა, დასავლეთის სადაზვერვო სამსახურები პოსტსაბჭოთა სივრცეში დივერსიული საქმიანობის გაფართოებაში დაადანაშაულა, დივერსიის ხელისშემწყობად კი ტრადიციულად, არასამთავრობო ორგანიზაციები და მედია გამოაცხადა.
„ჩრდილოატლანტიკური ალიანსის აგრესიული პოლიტიკის განხორციელების ფარგლებში, დასავლეთის სადაზვერვო სამსახურების, დიპლომატიური დეპარტამენტების და მათ მიერ კონტროლირებადი არასამთავრობო ორგანიზაციებისა და მედიის დივერსიული საქმიანობა ფართოდება პოსტსაბჭოთა სივრცეში“, – თქვა ФСБ-ეს დირექტორმა დღეს, 26 ნოემბერს, დსთ-ს წევრი ქვეყნების უსაფრთხოების უწყებებისა და სადაზვერვო სამსახურების მეთაურთა მე-20 შეხვედრაზე.
ამ შეხვედრაზე მან კვლავ გაიმეორა რუსული პროპაგანდის ერთ-ერთი მთავარი გზავნილი, რომ საქართველოში დასავლური დაზვერვის ძალისხმევით, ადგილი ჰქონდა მორიგ „ფერადი რევოლუციის განხორციელების“ მცდელობებს.
ბორტნიკოვმა მოლდოვაში საპრეზიდენტო არჩევნების „დასავლეთისთვის ხელსაყრელი“ კენჭისყრის შედეგები შეაფასა, როგორც პირდაპირ დასავლური დაზვერვის სამსახურების ერთობლივი ძალისხმევის შედეგი.
დსთ-ს წევრი ქვეყნების უსაფრთხოების უწყებებისა და სადაზვერვო სამსახურების მეთაურთა შეხვედრაზე ბორტნიკოვმა საბჭოთა პროპაგანდისთვის დამახასიათებელ ანტიდასავლურ ნარატივებიც გამოიყენა, რომლის მიხედვითაც დასავლური სამყარო, პოსტსაბჭოთა სივრცეში განხეთქილების შემომტანი და კონფლიქტის წამახალისებელი აქტორია; ნატო მდგომარეობის ესკალაციას ახდენს.
„ნატოს სამხედრო საფრთხე სტაბილურად იზრდება“, – თქვა მან. – „ნატოს ცალკეული ქვეყნები აქტიურად „ასხამენ ნავთს ცეცხლს“ დსთ-ს ქვეყნების ტერიტორიაზე მოწინააღმდეგე მხარეებში იარაღის მიწოდებით“, – განაცხადა ბორტნიკოვმა.
მისი თქმით, შეშფოთებას იწვევს დასავლური სადაზვერვო სამსახურების მზარდი ძალისხმევა „დსთ-ს ქვეყნებში ეროვნული და ქსენოფობიური განწყობების გაღვივების, საერთო ისტორიის დამახინჯებისა და მიგრაციის პრობლემის პოლიტიზების მიზნით“.
უფრო დეტალურად ანტიდასავლური პროპაგანდის საბჭოთა საწყისებზე, ქართულენოვანი საბჭოთა პრესის მაგალითებით, შეგიძლიათ წაიკითხოთ IDFI-ის კვლევით სტატიაში.
