„ბათუმელების“ მკითხველმა 97 742 ლარი შეუგროვა ნათიას – ქალი 30 სული პირუტყვით მთაში

ნათია აბულაძე, ქალი ხულოდან, რომელიც მარტო უვლის 30 სულ პირუტყვს და ოცნებობს ჰქონდეს პატარა მიწა, სადაც ცალკე სახლი და ბოსელი ექნება, „ბათუმელებმა“ მკითხველებს წელს, აგვისტოში გააცნო.

„ბათუმელების“ სტატიას და ვიდეომასალას მკითხველების დიდი გამოხმაურება მოჰყვა და ნათიას დახმარების სურვილი ათასობით ადამიანმა გამოთქვა.

ნათია აბულაძეს „ბათუმელების“ მკითხველმა, ჯამში, 97 742 ლარი შეუგროვა.

ნათია იალაღიდან დაახლოებით 20 დღის წინ დაბრუნდა თავის სოფელში. აჭარის მთებში წელს ნაადრევად დაზამთრდა და ნათიამ მხოლოდ ერთი ახალი ბოსლის აშენება მოასწრო მისი ოჯახის მიწის ნაკვეთზე, სადაც 15 სულ პირუტყვს შეინახავს ამ ზამთარში. მისი გეგმაა კიდევ ერთი ბოსელი ააშენოს, მაგრამ ავდრის გამო არ დასცალდა.

„თოვლმა მომისწრო და საქონლის ნახევარი მოშორებით, მეზობლის ბოსელში მყავს. იქ მომიწევს მათი შენახვა. 1 ძროხა მთაში მომიკვდა და 29 სული მყავს ახლა.

ძროხების გაყიდვას არ ვაპირებ. მინდა მოვუარო, ამ საქმეს მოვკიდო ხელი. ჯერ შემიძლია და შემდეგ ვნახოთ, ალბათ ვინმეს დავასაქმებ“.

იალაღიდან დაბრუნებულმა ნათიამ საქონლის გამოსაზამთრებლად თივის მომარაგება ვერ მოასწრო – „ახლა ვცდილობ თივა ვიყიდო. ცოტა მთიდან ჩამოვიტანე და ეს მაქვს მხოლოდ ახლა”.

ნათიას ისევ უნდა სახლი და ბოსელი იყიდოს ისეთ ადგილას, სადაც ფერმერულ საქმიანობას შეძლებს:

„ჩემს სოფელში საძოვრები არ არის. სანამ საქონელი ხბოებს არ მოიგებს, იქამდე არ მინდა მათი გაყიდვა. შემდეგ გავყიდი რამდენიმეს და ვიყიდი სახლს. ამისთვის ვწვალობ, აბა რისთვის?!“.

ნათია აბულაძე. ფოტო: ბათუმელები/ნინო ართმელაძე

„ბათუმელების“ რეპორტაჟის შემდეგ, ნათიას შესახებ გადაცემა მოამზადა “ნანუკა ჟორჟოლიანის შოუმ”. ტელეწამყვანის თქმით, გადაცემის მაყურებელმა ნათიასთვის 13 296 ლარი შეაგროვა.

ნახეთ „ნათიას ბრძოლა სიღარიბის წინააღმდეგ“