საქართველოში 26 ოქტომბერს საპარლამენტო არჩევნები ჩატარედება. მიუხედავად იმისა, რომ ვიცით ოფიციალური სტატისტიკა ქვეყანაში მცხოვრებთა და ამომრჩეველთა ერთიან სიაში მყოფი ადამიანების რაოდენობის შესახებ, შეუძლებელია იმის დადგენა, თუ რამდენი მოქალაქე იმყოფება ამ დროისთვის საქართველოში. ასეთი არც ოფიციალური სტატისტიკა არსებობს.
საქართველოს რამდენი მოქალაქე ცხოვრობს საქართველოში და რამდენი იმყოფება საზღვარგარეთ ამის დადგენა, როგორც სტატისტიკის ეროვნულ სამსახურში აცხადებენ, მხოლოდ საყოველთაო აღწერით იქნება შესაძლებელი. საყოველთაო აღწერა კი მიმდინარე წელს, არჩევნების შემდეგ ჩატარდება. ასეთი აღწერა საქართველოში ბოლოს 2014 წელს ჩატარდა.
კედლის საარჩევნო სია ბათუმის ერთ-ერთ საარჩევნო უბანში / 22.10.2024 / საბოლოო სიებს უბნები არჩევნების წინა დღით, 25 ივნისს მიიღებენ ცესკოდან
- ცენტრალური საარჩევნო კომისიის [ცესკო] მონაცემებით, 2024 წლის 18 ოქტომბრის მდგომარეობით საქართველოს ამომრჩეველთა საერთო რაოდენობა არის 3 508 294
- საქართველოს სტატისტიკის ეროვნული სამსახურის [საქსტატი] 2024 წლის მონაცემებით კი, საქართველოში მოსახლეობის რიცხოვნობა სულ არის 3 694 608
თუ საქსტატის მონაცემებს, ანუ მოსახლეობის საერთო რიცხოვნობას გამოვაკლებთ ამომრჩეველთა საერთო რაოდენობას, საქართველოში 18 წლამდე ასაკის 186 314 ადამიანი უნდა ცხოვრობდეს. თუმცა, მხოლოდ საქასტატის მონაცემებით, საქართველოში 18 წლამდე ასაკის 841 727 ადამიანი ცხოვრობს, ანუ 655 413-ით მეტი.
შესაბამისად, იგივე საქსტატის მონაცემებით, საქართველოში 2 852 881 ამომრჩეველი უნდა იყოს, ანუ 655 413-ით ნაკლები, ვიდრე ცესკოს ერთიან სიაშია.
რატომ არის ასეთი დიდი ცდომილება ოფიციალური უწყებების მონაცემებში? – საქსტატსა და ცესკოში აცხადებენ, რომ მათი მონაცემების ერთმანეთთან შედარება არ შეიძლება.
„საერთო სიისა და საერთო რიცხოვნობის მონაცემები ერთმანეთს არავითარ შემთხვევაში არ უნდა შევადაროთ. ჩვენი და ცესკოს ციფრების შედარება არ შეიძლება. ჩვენთან არის ფაქტობრივი მცხოვრებლები, ანუ მუდმივი მოსახლეობა [ამასთან, ბოლო მონაცემები 2024 წლის 1-ლი იანვრის მდგომარეობით გვაქვს გამოქვეყნებული]. ცესკოსთან, ალბათ, საზღვარგარეთ მყოფი საქართველოს მოქალაქეებიც შედიან, რომლებიც მოცემული მომენტისთვის არ არიან ჩვენს რიცხოვნობაში.
გასათვალისწინებელია ისიც, რომ ჩვენს სტატისტიკაში ხვდება საქართველოში მცხოვრები ნებისმიერი უცხო ქვეყნის მოქალაქე, რომელიც 1 წელი და მეტი ხნით იმყოფება ან აპირებს დარჩენას საქართველოში“, – უთხრეს „ბათუმელებს“ საქსტატში.
„ცესკოს და საქსტატის ეს ორი მონაცემი კოლერაციაში ერთმანეთთან ვერ მოდის. ეს ორი მონაცემი არის აბსოლუტურად სხვადასხვა. ამომრჩეველთა ერთიანი სია შედგება საქართველოს ყველა ლეგალური ამომრჩევლისგან, რომლებიც, ძალიან მარტივად რომ ვთქვათ, არის არა მარტო საქართველოში, არამედ საზღვარგარეთაც, მთელ მსოფლიოში.
ამასთან საქსტატის მონაცემები მოიცავს 18 წლამდე ასაკის ადამიანებს და იმ კატეგორიის ამომჩევლებსაც, რომლებიც ვერ ხვდება ჩვენს ერთიან სიაში, მაგალითად არ აქვს ვალიდური პირადობის მოწმობა და/ან პასპორტი, არასდროს არ ჰქონია რეგისტრაციის მისამართი და სხვა“, – აღნიშნა „ბათუმელებთან“ სატელეფონო საუბარში ცესკოს თავმჯდომარის მოადგილე გიორგი შარაბიძემ.
აღსანიშნავია, რომ ცესკოს განცხადებით სხვა სახელმწიფოში შექმნილი საარჩევნო უბნების სპეციალურ სიებში ამომრჩეველთა რაოდენობა არის 95 910. ანუ ეს ის ამომრჩევლებია, რომლებიც ხმას საზღვარგარეთ გახსნილ უბნებზე მისცემენ.
ამ თემაზე: 26 ოქტომბრის არჩევნებისთვის ამომრჩეველთა საერთო რაოდენობა 3 508 294-ს შეადგენს
საერთო სიაში ცესკოს აღნიშნული ჰყავს ისეთი ამომრჩევლები, რომლებსაც აქვთ სტატუსი – „იმყოფება უცხოეთში“ და ასევე სტატუსი – „იმყოფება საკონსულო აღრიცხვაზე“ [საზღვარგარეთ].
ეს კედლის სიებშიც არის მითითებული შესაბამისი ამომრჩევლის გასწვრივ: „იმყ. უცხოეთში“ და „საკონს. აღრ.“, რომლის გვერდით მითითებულია ასევე კონკრეტული ამომრჩევლის ერთიან სიაში შეტანის თარიღი:
ამომრჩეველთა კედლის სია ბათუმის ერთ-ერთ საარჩევნო უბანში / 22.10.2024
„ბათუმელები“ შეეცადა გაერკვია ასეთი სტატუსი აქვს თუ არა მინიჭებული ყველა იმ ამომრჩეველს, რომელიც დღეს ფაქტობრივად საზღვარგარეთ იმყოფება და რამდენია მათი რაოდენობა. ცესკოდან ამ რიცხვების მიღებით მიახლოებით ის მაინც გვეცოდინებოდა, ერთიან სიაში შეტანილი ამომრჩევლებიდან რამდენია ფაქტობრივად საქართველოში. თუმცა ცესკომ კითხვების ოფიციალურად, წერილობით გადაგზავნა მოგვთხოვა.
ინფორმაცია საქართველოს მოქალაქეების რაოდენობის შესახებ 2024 წლის 13 ოქტომბრის მდგომარეობით [ამასთან, რამდენი იყო მათ შორის არასრულწლოვანი და რამდენი სრულწლოვანი] „ბათუმელებმა“ სახელმწიფო სერვისების განვითარების სააგენტოსგანაც მოითხოვა, თუმცა სააგენტოშიც გვითხრეს, რომ წერილობით მივმართოთ.
ჩვენს კითხვებზე ცესკოდან და სერვისების სააგენტოდან პასუხების მიღების შემთხვევაში მასალა განახლდება.
„იმყოფება საზღვარგარეთ“ – ეს არის ის კატეგორია ამომრჩევლების, რომლებიც არ არიან საკონსულო აღრიცხვაზე, მაგრამ უფიქსირდებათ საზღვრის კვეთა. თუმცა, ასეთი ამომრჩეველი შეიძლება 26 ოქტომბერს ან მანამდეც დაბრუნდეს საქართველოში და ხმა აქ მისცეს შესაბამის უბანზე რეგისტრაციის მიხედვით“, – გვითხრეს ცესკოში.
ამ ყველაფრის გათვალისწინებით, როგორც ზემოთ გამოვთვალეთ, მინიმუმ 655 413 ამომრჩეველი [ანუ საქართველოს 18 და მეტი ასაკის მოქალაქე] უცხოეთში იმყოფება. ცესკოს ინფორმაციით კი, 26 ოქტომბერს უცხოეთში გახსნილი უბნების სპეცსიებში მყოფ მხოლოდ 95 910 ამომრჩეველს ექნება ხმის მიცემის საშუალება.
ცესკომ გამოაქვეყნა ამომრჩეველთა საერთო რაოდენობაც საქართველოში და საქართველოს ყოველ საარჩევნო ოლქში [2024 წლის 14 ოქტომბრის მდგომარეობით], რომლის მიხედვითაც:
- ამომრჩეველთა რაოდენობა საქართველოში არის 3 495 789, ხოლო საზღვარგარეთ რეგისტრირებულ ამომრჩეველთა რაოდენობაა – 12 505.
თუ ამ მონაცემებს წინა, 2020 წლის 31 ოქტომბრის საპარლამენტო არჩევნების მონაცემებს შევადარებთ:
- 2024 წლისთვის ამომრჩეველთა საერთო რაოდენობა შემცირებულია 17 729 ამომრჩევლით [იყო 3 526 023 და არის 3 508 294]
- ამომრჩეველთა რაოდენობა საქართველოში შემცირებულია 16 064 ამომრჩევლით [იყო 3 511 853, არის 3 495 798]
- შემცირებულია ასევე საზღვარგარეთ რეგისტრირებულ ამომრჩეველთა რაოდენობაც 1 665 ამომრჩევლით [იყო 14 170 და არის 12 505]
ამომრჩეველთა საერთო რაოდენობა 2024 წლის 26 ოქტომბრის არჩევნებისთვის 14 ოქტომბრის მდგომარეობით / წყარო: ცესკო
რაც შეეხება საზღვარგარეთ რეგისტრირებულ ამომრჩეველთა რაოდენობას, ცესკოს განმარტებით, ეს არის საქართველოს მოქალაქეების ის კატეგორია, რომლებსაც რეგისტრაციის მისამართი არ აქვთ საქართველოში და აქვთ საზღვარგარეთ.
„რაც შეეხება უცხოეთში გახსნილი უბნების სპეცსიებში მყოფ 95 910 ამომრჩეველს, ამ რაოდენობაში შედის, როგორც საზღვარგარეთ რეგისტრირებული ამომრჩევლები, ასევე საქართველოს ის მოქალაქეები, რომლებსაც რეგისტრაციის მისამართი აქვთ საქართველოში, მაგრამ იმყოფებიან უცხოეთში და ხმის მისაცემად აღრიცხვაზე დადგნენ შესაბამის საკონსულოში“ – გვითხრეს ცესკოში.
26 ოქტომბერს საპარლამენტო არჩევნების პარალელურად აჭარაში უმაღლესი საბჭოს არჩევნებიც ჩატარდება, რომელშიც ხმის მიცემის უფლება აჭარის მუნიციპალიტეტებში რეგისტრირებულ მოქალაქეებს აქვთ.
ცესკოს მონაცემების მიხედვით, უშუალოდ აჭარაში ამომრჩეველთა რაოდენობა, 2024 წლის 14 ოქტომბრის მდგომარეობით, 4 791-ით არის გაზრდილი, ვიდრე ამავე წლის 15 ივლისის მონაცემებით იყო.
ამომრჩეველთა რაოდენობა აჭარის ოლქებში ცესკოს 2024 წლის 15 ივლისისა და 14 ოქტომბრის მონაცემებით:
წყარო: ცესკო
ამ თემაზე: რამდენი ამომრჩეველია ბათუმისა და აჭარის სხვა ოლქებში – ცესკოს მონაცემები
დავუბრუნდეთ საქართველოს მოსახლეობის რაოდენობას.
საქსტატის ინფორმაციით, „მოსახლეობის რიცხოვნობა და მისი შემადგენლობა განისაზღვრება ყოველი წლის დასაწყისისთვის. ზუსტი მონაცემები მოსახლეობის რიცხოვნობისა და მისი შემადგენლობის შესახებ მიიღება მოსახლეობის საყოველთაო აღწერებით, ხოლო აღწერათა შორის პერიოდში მოსახლეობის რიცხოვნობა გაიანგარიშება 1-ლი იანვრის მდგომარეობით და მიიღება ბუნებრივი მატებისა და გარე მიგრაციის გათვალისწინებით“.
აქვე გასათვალისწინებელია, რომ მოსახლეობის საერთო რიცხოვნობაში სტატისტიკის ეროვნულ სამსახურს ქვეყანაში დროებით შემოსული უცხო ქვეყნის მოქალაქეებიც შეჰყავს. თუმცა რამდენი უცხოელია საერთო რიცხოვნობაში საქსტატმა ვერ მოგვაწოდა.
„სტატისტიკური მიზნით, საქართველოს მუდმივ მოსახლეობად აღირიცხება ქვეყანაში 12 თვითა და მეტი ხნით მცხოვრები ადამიანები, მიუხედავად მოქალაქეობის ქვეყნისა. აგრეთვე ის მოსახლეობა, რომელთა ქვეყანაში ყოფნა არ აღემატება 12 თვეს, მაგრამ აპირებს დარჩენას 12 თვეზე მეტ ხანს“, – მოგვწერეს საქსტატიდან.
საქართველოში საყოველთაო აღწერის თარიღად 2024 წლის 14 ნოემბრიდან 19 დეკემბრის ჩათვლით პერიოდია განსაზღვრული.
„2024 წლის მოსახლეობის საყოველთაო აღწერის დროსაც საქსტატი იხელმძღვანელებს მუდმივი მოსახლის ზემოთ მოცემული განმარტებით. მათ შორის შეგროვდება მონაცემები მუდმივი მოსახლეობის მოქალაქეობის ქვეყნების შესახებაც“, – აღნიშნულია საქსტატის მიერ „ბათუმელებისთვის“ მოწოდებულ ინფორმაციაში.
საპარლამენტო არჩევნების მოახლოებასთან ერთად, როგორც მედია, ისე ოპოზიციის წარმომადგენლები ავრცელებენ ინფორმაციას, რომ ამომრჩევლებს პირადობის მოწმობებს ართმევენ ან მათ პირად ნომრებს ინიშნავენ.
საარჩევნო პერიოდში მსგავსი ფაქტები, შესაძლოა, ამომრჩევლის ნებაზე ზეგავლენის ან მათთვის არჩევნებში მონაწილეობაში ხელის შეშლისთვის იქნას გამოყენებული.
ამ თემაზე ვრცლად:
