ზამლეთი-ხიხაძირის გზის შესაკეთებლად დაწყებული სამუშაოები 2021 წელში უნდა დასრულებულიყო, თუმცა, გზის ეს მონაკვეთი ამ დრომდე გაუკეთებელია. ამჯერად, არჩევნებამდე ორი თვით ადრე, პრემიერ-მინისტრმა ირაკლი კობახიძემ ხელი მოაწერა მთავრობის განკარგულებას, რითაც ცვლილება შეიტანა 2019 წლის განკარგულებაში და გზების დეპარტამენტს სამუშაოების განახლება დაავალა.
მთავრობის განკარგულებით, სამუშაოებს ზამლეთი-ხიხაძირის გზაზე შეასრულებს კომპანია „არალი“, რომელიც სულ სხვა გზის სამუშაოების ტენდერშია გამარჯვებული. ამ ტენდერით „არალს“ 2 წლის განმავლობაში ევალება ბათუმი-ახალციხის მაგისტრალზე იმ სამუშაოების ჩატარება, რაც აუცილებელი იქნება ამ გზის ნორმალურად ფუნქციონირებისთვის.
აქვე აღსანიშნავია, რომ ბათუმი-ახალციხის ავტომაგისტრალის ხულო-გოდერძის მონაკვეთიც, რომელიც 2020 წელს უნდა დასრულებულიყო, დღემდე არ დასრულებულა. მთავრობამ წინასაარჩევნოდ აქაც სხვა ტენდერში გამარჯვებული კომპანიები, მათ შორის „არალიც“ დაასაქმა.
ამ თემაზე ვრცლად: რა ხდება ხულო-გოდერძის გზაზე – პროექტი, რომელიც 4 წლის წინ უნდა დასრულებულიყო
რაც შეეხება ზამლეთი-ხიხაძირის გზას, მის რეაბილიტაციაზე საქართველოს საავტომობილო გზების დეპარტამენტის მიერ 2022 წლიდან დღემდე გამოცხადებული არცერთი ტენდერი არ შედგა.
შპს „არალი“ კი დეპარტამენტმა „ბათუმი[ანგისა]-ახალციხის საავტომობილო გზაზე ჩასატარებელი საგზაო სამუშაოების“ ტენდერში გამოავლინა გამარჯვებულად და მასთან ხელშეკრულება 50 მილიონ ლარზე 2024 წლის 26 ივნისს გააფორმა [ტენდერი პრეისკურანტით იყო გამოცხადებული, ანუ კომპანიას ეტაპობრივად იმ სამუშაოების შესაბამისად გადაუხდიან თანხას, რა სამუშაოებსაც მომდევნო 2 წლის განმავლობაში შეასრულებს. მთავრობის ახალი განკარგულებით კი ამ ტენდერის ფარგლებში თანხა ხიხაძირის გზაზეც დაიხარჯება].
როდის დაიწყებს და დაასრულებს „არალი“ სამუშაოებს ხიხაძირის გზაზე, ამ დროისთვის უცნობია. უცნობია ასევე რა ღირებულების სამუშაოები უნდა ჩატარდეს, თუმცა, ბოლო ტენდერი, რომელიც არ შედგა, დეპარტამენტს 7,5 მილიონი ლარით ჰქონდა გამოცხადებული.
თავდაპირველი, 2019 წლის განკარგულებით, რომელსაც ხელს მაშინდელი პრემიერი მამუკა ბახტაძე აწერს, გზის აღნიშნული მონაკვეთი მისი რეაბილიტაციის შემდეგ საქართველოს გზების დეპარტამენტმა მოვლა-შენახვის მიზნით აჭარის გზების დეპარტამენტს უნდა გადასცეს.
ზამლეთი-ხიხაძირის გზასთან დაკავშირებული სამუშაოების და არშემდგარი ტენდერების შესახებ ვრცლად ნახეთ ამ ბმულზე:
გზა ხიხაძირამდე, რომელიც მესამე წელია ვერ გააკეთეს – ახალი ტენდერი 7,5 მილიონი ლარით
მთავარი ფოტო: ხიხაძირის გზა / „ბათუმელების“ არქივიდან
