კომპანია „ბათუმის წყლის“ ინფორმაციით, ბათუმში, თამარ მეფის გამზირზე, „სოკარის“ ბენზინგასამართის მიმდებარე ტერიტორიაზე წყალმომარაგების ცენტრალური მაგისტრალის დაზიანებული ურდულის შეცვლაა აუცილებელი, რის გამოც საჭიროა ჩაქვის რეზერვუარის დაცლა, რაც გამოიწვევს ქალაქისთვის წყლის მიწოდების დროებით შეწყვეტას.
კომპანიის ინფორმაციით, სამუშაოების ხანგრძლივობა მოიცავს 17 აგვისტოს საღამოს 23:00 საათიდან 18 აგვისტოს დღის 14:00 საათამდე პერიოდს.
ამ პერიოდში კი, წყლის მიწოდება შეიზღუდება შემდეგ მისამართებზე: ბენზეში, ბარცხანაში, ორთაბათუმში, წინსვლაში, ჩაისუბანსა და გარადოკში, ხელვაჩაურის მიმართულებით, ადლიის ქუჩასა და ჩიხებში, ასევე აეროპორტის გზატკეცილზე, კაჩინსკების, აღმაშენებლის, ტაბიძის, ლეონიძისა და რურუას ქუჩებზე.
„ასევე, წყალმომარაგების შეზღუდვასთან დაკავშირებით დეტალურ ინფორმაციას აბონენტები მიიღებენ შეტყობინების სახით. დამატებითი ინფორმაციის მისაღებად აბონენტებს შეეძლებათ დაგვიკავშირდნენ ცხელ ხაზზე 1152 ან მოგვმართონ ბათუმის წყლის ოფიციალურ ფეისბუქ გვერდზე“ – აცხადებს „ბათუმის წყალი“.
განახლება: მოგვიანებით „ბათუმის წყალმა გაავრცელა კიდევ ერთი განცხადება, სადაც აღნიშნულია, რომ „წყალმომარაგების ცენტრალური მაგისტრალის დაზიანებული ურდულის აღსადგენად მოსამზადებელი სამუშაოები უკვე განხორციელდა. შედეგად წყალმომარაგების შეზღუდვა არ ვრცელდება ქალაქის არცერთ მისამართზე. აღდგენითი სამუშაოების მეორე ეტაპი გაგრძელდება 18 აგვისტოს საღამოს 23:00 საათიდან. აბონენტები წყალმომარაგების შეზღუდვებთან დაკავშირებით დამატებით ინფორმაციას მიიღებენ, მათ შორის შეტყობინების სახით.“
ფოტო: „ბათუმის წყალი“
