ბათუმის ბაზარზე გამოჩნდა რუსული წარმოების ნაყინი, წარწერით „СССР“. ნაყინმა მალევე მიიქცია ყურადღება. როგორც შეფუთვაზე მითითებული ინფორმაციით ვიგებთ, ნაყინის იმპორტს შპს „არქტიკა“ ახორციელებს.
„ბათუმელები“ დაუკავშირდა შპს „არქტიკას“ წამომადგენლობას. მათი ინფორმაციით, ბათუმის ბაზარზე მაისიდან ოპერირებენ. „არქტიკაში“ ამბობენ, რომ მწარმოებელმა კომპანიამ, რომელიც რუსეთში, თათრეთის რესპუბლიკაში მდებარეობს, თავად გამოგზავნა საქონელი, ისე რომ შერჩევის საშუალება მათ არ ჰქონდათ: „ჩვენ არ შეგვიკვეთავს ამ წარწერის ნაყინი, ქარხანამ გამოუშვა, ჩამოვიდა და სხვა გზა აღარ გვქონდა“. კომპანიაში დასძენენ, რომ ამ წარწერის ნაყინი თითქმის აღარ დარჩა: „მაქსიმუმ ერთ კვირაში ამოიყიდება და ამ ქარხნის პროდუქცია აღარც შემოვა“. შპს „არქტიკა“ აღნიშნული ნაყინის მომწოდებელთან ურთიერთობის შეწყვეტას გეგმავს.
აღნიშნული კომპანიის მიერ იმპორტირებული ნაყინი, მათივე ინფორმაციით, ბათუმის გარდა თითქმის მთელ საქართველოში იყიდება.
რამდენიმე ხნის წინ ბათუმის ბულვარის ტერიტორიაზე არსებულ სუვენირების სავაჭრო პუნქტებში გამოჩნდა სუვენირები რუსეთ-საქართველოს “სიყვარულზე”.
