ბათუმში, შავშეთის ქუჩაზე, ე.წ. მანთაშევის შლაგბაუმთან ქალაქის მერია საავტომობილო გვირაბის აშენებას გეგმავს.
„საჭიროა გზაგამტარი გვირაბის მოწყობა, რომლის უმთავრეს მიზანს წარმოადგენს შავშეთის ქუჩაზე გადატვირთული მოძრაობის განტვირთვა, რაც შესაძლებელია გვირაბის მშენებლობით.
საპროექტო გვირაბმა უნდა უზრუნველყოს შავშეთის, წერეთლის და მაიაკოვსკის ქუჩებისკენ მიმავალი სატრანსპორტო საშუალებების უწყვეტ რეჟიმში შეუფერხებლად გადაადგილება და პირიქით, რითაც საგრძნობლად განიტვირთება, როგორც შავშეთის ქუჩა, ასევე წერეთლის, პუშკინისა და მაიაკოვსკის ქუჩები“ – წერია ბაზრის კვლევის დოკუმენტში.
აქვე აღსანიშნავია, რომ მაიაკოვსკის ქუჩის ნაწილს ქალაქის საკრებულომ სახელი გადაარქვა და მანთაშევის გადასასვლელიდან ბონის კულტურის სახლამდე მონაკვეთს არა მაიაკოვსკის, არამედ წმინდა დიაკონი სევერიანე აჭარელი აღმსარებლის სახელი ჰქვია.
შესაბამისად, საავტომობილო გვირაბი მანთაშევთან [ავტოსადგურის მიმდებარედ] წერეთლის, შავშეთისა და სევერიანე აჭარელის ქუჩების კვეთაში მოეწყობა.
ბაზრის კვლევას, მშენებლობისთვის საჭირო კვლევების, პროექტირებისა და შემდეგ სამშენებლო სამუშაოების ფასის დასადგენად, მერიის საქალაქო ინფრასტრუქტურისა და კეთილმოწყობის სამმართველო ატარებს.
ტენდერი ერთი ხელშეკრულების ფარგლებში DesignBuild მეთოდით გამოცხადდება, რომლის პირობაც „შავშეთის, წერეთლის და მაიაკოვსკის ქუჩების გადაკვეთაში გზაგამტარი გვირაბის დეტალური პროექტის მომზადებისა და მის საფუძველზე სამშენებლო სამუშაოების სახელმწიფო შესყიდვა [2024-2025 წწ სახსრებით]“ იქნება.
„ამ ეტაპზე რისი თქმაც შეგვიძლია, არის ის, რომ საავტომობილო გვირაბი აუცილებლად გავა [მანთაშევზე] სარკინიგზო ხაზის ქვეშ. სხვა დანარჩენი, თუ როგორ დაპროექტდება გზაგამტარი გვირაბი, დამოკიდებული იქნება ბაზრის კვლევასა და ტენდერზე. შემდგომში, რა გადაწყვეტას შემოგვთავაზებს ტენდერში გამარჯვებული, იმის შესაბამისად გადაწყდება ტექნიკური საკითხები და გვირაბის მშენებლობა“ – გვითხრეს მერიის სამმართველოში.
სამმართველოს ინფორმაციით, ტენდერის გამოცხადების შემდეგ გამარჯვებულთან ხელშეკრულების დადებიდან გვირაბის აშენებამდე ვადა 10 თვეა გათვლილი [ანუ, ამ ვადაში შედის საკვლევ–საძიებო სამუშაოები, პროექტირებაც და მშენებლობაც].
ბაზრის კვლევის პირობის მიხედვით, დაინტერესებულმა პირმა არაუგვიანეს 2024 წლის 21 ივნისის 18:00 საათისა მერიის სამმართველოში უნდა წარადგინოს თავისი წინადადება, მათ შორის განფასებული ცხრილი და ინფორმაცია გამოცდილების თაობაზე.
მანთაშევის გადასასვლელი ბათუმში / ფოტო „ბათუმელების“ არქივიდან
ტექნიკური დავალების დოკუმენტის მიხედვით, უნდა დამუშავდეს სრული საპროექტო-სახარჯთაღრიცხვო დოკუმენტაცია, რომელიც მოიცავს [მაგრამ არ შემოიფარგლება] საკვლევ–საძიებო სამუშაოებს; ასევე, მიმწოდებელმა გვირაბის პროექტირებისას უნდა გაითვალისწინოს შემდეგი [სავარაუდო] პარამეტრები:
- გვირაბის მოწყობა 50-80 მეტრი;
- თითო ზოლის სიგანე [არანაკლები] 3,5 მეტრი;
- სავალი ნაწილის სიგანე [არანაკლები] 7,0 მეტრი;
- რკ.ბეტონის სარეგულაციო კედლების მოწყობა სიგრძით საშ. 160,0 გრძ.მ;
- საძირკვლის გამაგრება შპურებისა და ხიმინჯების გამოყენებით;
- ა/ბეტონის საფარის აღდგენა-რეაბილიტაცია საშ. 10 000,0მ2;
- გვირაბში სანიაღვრე სისტემის მოწყობა ტუმბოების გათვალისწინებით;
- საექსპლუატაციო და უსაფრთხოების ტროტუარი (ცალ მხარეს მაინც).
- დრენაჟის და ჰიდროიზოლაციის მოწყობა;
- გვირაბის ელ.განათება;
- მოძრაობის რეგულირება [წრიული, კუნძულები, საგზაო ნიშნები, საგზაო მონიშვნა];
წერეთლის, შავშეთისა და სევერიანე აჭარელის ქუჩების კვეთა [მარჯვნივ მანთაშევის გადასასვლელი]
- „მშენებლობის დასრულების შემდეგ საგარანტიო პერიოდი შეადგენს 60 თვეს საბოლოო მიღება-ჩაბარების აქტის გაფორმებიდან.
- ტენდერში მონაწილე პრეტენდენტს [შესყიდვაში მონაწილეობის მსურველ პირს] 2019 წლის 1-ლი იანვრიდან ტენდერის გამოცხადების დღემდე შესრულებული უნდა ჰქონდეს:
- ნაპირსამაგრი, მიწისქვეშა კომუნიკაციების, წყლისა და კანალიზაციის,საავტომობილო გზების, გზატკეცილების, ქუჩების მშენებლობა, რეკონსტრუქცია, რეაბილიტაციის სამუშაოები საერთო ღირებულებით არანაკლებ 80 მილიონი ლარის ოდენობით;
- უშუალოდ ერთი ხელშეკრულების ფარგლებში ნაპირსამაგრის მოწყობა რეაბილიტაცია, მიწისქვეშა კომუნიკაციების, წყლისა და კანალიზაციის,საავტომობილო გზების, გზატკეცილების, ქუჩების მშენებლობა, რეკონსტრუქცია, რეაბილიტაცია სამუშაოები 10 მილიონი ლარის ოდენობით;
- ხელოვნური ნაგებობების სამშენებლო სამუშაოები არანაკლებ 20 მილიონი ლარის ოდენობით, რომელიც აუცილებლად უნდა მოიცავდეს შპუნტების და რკინაბეტონის ხიმინჯების მოწყობის სამუშაოებს;
- იმ შემთხვევაში, თუ მიმწოდებლის მიერ შესრულებული სამუშაოების ღირებულებამ არ შეადგინა ამ ხელშეკრულებით გათვალისწინებული თანხა, შემსყიდველი აუნაზღაურებს მიმწოდებელს მხოლოდ მის მიერ ფაქტობრივი მოცულობებით შესრულებული სამუშაოს ღირებულებას, ხარჯთაღრიცხვის მიხედვით.
- აღნიშნულიდან გამომდინარე მიმწოდებელს არ უნდა გააჩნდეს პრეტენზია სამუშაოთა აუთვისებელი მოცულობებისა და სამუშაოთა სახეობების შესრულებაზე და მის გადახდაზე.
- 2024 წელს შემსყიდველის მიერ მიმწოდებლის მიერ შესრულებული სამუშაოების ღირებულების გათვალისწინებით ანაზღაურდება 1 000 000 ლარი; ამასთან, შემსყიდველი უფლებამოსილია მიიღოს გადაწყვეტილება 2024 წელს დამატებითი დაფინანსების შესახებ“ და სხვა.
მშენებლობის ღირებულება ბაზრის კვლევის საფუძველზე ტენდერის გამოცხადების წინ დაზუსტდება.
მერიის სამმართველოსგან მოწოდებული რენდერის მიხედვით, რკინიგზის ლიანდაგის ქვეშ გვირაბი უშუალოდ შავშეთის ქუჩაზე მოეწყობა; გვირაბს ზემოთ კი გაკეთდება წრიული, საიდანაც ტრანსპორტის მოძრაობა დარეგულირდება შავშეთის, სევერიანე აჭარელისა და წერეთლის ქუჩებიდან და ამ ქუჩების მიმართულებით. თუმცა, სევერიანე აჭარელის ქუჩიდან მომავალი ავტომანქანა როგორ გადავა ბაქოს ქუჩაზე შავშეთის ქუჩის გავლით – ესკიზზე არ ჩანს. „ტრანსპორტის მოძრაობის სქემა დაზუსტდება პროექტირების დროს. ეს არის სამუშაო ვერსია“ – გვითხრეს „ბათუმელებს“ ქალაქის მერიის სამმართველოში.
აღსანიშნავია ისიც, რომ შავშეთის ქუჩაზე [ბაგრატიონიდან-ბაქოს ქუჩამდე მონაკვეთში] სანიაღვრე კოლექტორის მშენებლობაც მიმდინარეობს.
„სანიაღვრე კოლექტორისა და შემდგომში გვირაბის სამშენებლო სამუშაოები ერთმანეთს ხელს არ შეუშლის“ – გვითხრეს დღეს, 17 ივნისს, მერიის საქალაქო ინფრასტრუქტურისა და კეთილმოწყობის სამმართველოში.
გვირაბი მანთაშევის შლაგბაუმის ქვეშ / რენდერი-ესკიზი / წყარო: მერიის სამმართველო
წლების წინ მანთაშევის გადასასვლელთან საავტომობილო საცობის პრობლემის გადასაჭრელად არა გვირაბის, არამედ ხიდის მშენებლობის საკითხი განიხილებოდა, თუმცა აჭარის მთავრობაში ამ საკითხს მსვლელობა აღარ მიეცა.
ამ თემაზე:
