ბათუმის მერიის ინფორმაციით, შავშეთის ქუჩის სარეაბილიტაციო სამუშაოების გამო, 2 თვის განმავლობაში სატრანსპორტო მოძრაობა ცალმხრივად შეიზღუდა პორტის მიმდებარედ ბაქოს ქუჩაზე – ესტაკადასა და შავშეთის ქუჩას შორის არსებულ მონაკვეთში.
„შეზღუდვის პერიოდში ავტოსატრანსპორტო საშუალებების, ასევე მუნიციპალური ტრანსპორტის მოძრაობა დაშვებულია გზის ერთ ზოლში“, – აცხადებს მერია.
ბაქოსა და შავშეთის ქუჩების კვეთაში, საქალაქო ინფრასტრუქტურისა და კეთილმოწყობის სამმართველოს ინფორმაციით, სანიაღვრე კოლექტორი უნდა მოეწყოს.
სანიაღვრე კოლექტორის მშენებლობა შავშეთის ქუჩაზე დაწყებულია და სამუშაოები ამჟამადაც მიმდინარეობს [„გორგიას“ მიმდებარედ], რის გამოც ტრანსპორტის მოძრაობა შავშეთიც ქუჩაზეც შეზღუდულია.
ბაქოს ქუჩაზე სავალი ნაწილის ერთი ზოლის [პორტის მხარეს] ჩაკეტვის გამო, ტრანსპორტი ორმხრივად იმოძრავებს მეორე [კათოლიკური ეკლესიის მხარეს არსებულ] ზოლში:
ბაქოს ქუჩა ესტაკატადან შავშეთის კვეთამდე მონაკვეთში [მონიშნულია წითელი ხაზით] ცალმხრივად ჩაიკეტა. ტრანსპორტი ორმხრივად იმოძრავებს მეორე ზოლში [აღნიშნულია მწვანე ხაზით].
