სიახლეები

„ხალხური თამაშობები აჭარაში“ – ტურიზმის სააგენტო ახალ წიგნს ბეჭდავს

23.03.2024 • 3532
„ხალხური თამაშობები აჭარაში“ – ტურიზმის სააგენტო ახალ წიგნს ბეჭდავს

აჭარის ტურისტული პროდუქტების განვითარების სააგენტოს ინფორმაციით ახალი სახელმძღვანელოს – „ხალხური თამაშობები აჭარაში“ გამოცემა იგეგმება. წიგნზე მუშაობა უკვე დაწყებულია.

„ამ ეტაპზე რეგიონში შემონახული 50-ზე მეტი ტრადიციული თამაშია მოძიებული. წიგნის გამოცემის მიზანი აჭარის ეთნოკულტურულ სინამდვილეში შემონახული ტრადიციული, არქაული თამაშების თავდაპირველი სახის აღდგენა, სათამაშოების მოძიება-შესწავლა და მათი პოპულარიზაციაა.

წიგნში შეტანილი თამაშობები ორიგინალური ილუსტრაციებით იქნება დასურათებული, რომელზეც ეთნო მხატვარი მუშაობს. წიგნის გამოცემა
მიმდინარე წლის ზაფხულისთვის იგეგმება.“ – აცხადებს სააგენტო.

„საბავშვო თამაშობათა შესწავლა და პრაქტიკაში მათი კვლავ დაბრუნება პროექტის ერთ-ერთი დანიშნულებაა. პროექტით გათვალისწინებულია, აგრეთვე, ხალხურ ყოფაში გამოყენებული, ბუნებრივი მასალისაგან დამზადებული სათამაშოების დაფიქსირება და მათი რეწვის შესაძლებლობების კვლევა. ყველაფერი ეს საინტერესო იქნება არა მხოლოდ ქართველი მკითხველისთვის, არამედ ჩვენი ქვეყნის სტუმრებისთვისაც“ – ამბობს ლელა გოგუაძე, ტურისტული პროდუქტების განვითარების სააგენტოს ხელმძღვანელი.

„აჭარაში მივიწყებული ხალხური თამაშობებისა და სათამაშოების კვლევაზე, ხოლო კვლევის ფარგლებში შესწავლილი მასალით გზამკვლევის მომზადებაზე“, ტურისტული პროდუქტების მართვის სააგენტომ ტენდერი 45 ათასი ლარით 2024 წლის 12 იანვარს გამოაცხადა.

ტენდერში გამარჯვებულ ა[ა]იპ „ლიმეს პონტიკუსთან“ კი სააგენტომ ხელშეკრულება 39 999 ლარზე 2024 წლის 5 თებერვალს გააფორმა. ამ ორგანიზაციის დამფუძნებელი და დირექტორია ემზარ კახიძე.

ხელშეკრულების მიხედვით: „ქვეკონტრაქტორის დასაშვებობის საკითხს წყვეტს სააგენტო“, მომსახურების გაწევის საბოლოო ვადა კი, ხელშეკრულების გაფორმებიდან 2024 წლის 3 მაისამდეა.

ვრცლად ტენდერის შესახებ: აჭარაში ხალხური თამაშებისა და სათამაშოების გზამკვლევს მოამზადებენ

ამავე თემაზე:

ეფენდელა, ქორი ნენეი და სხვა ხალხური თამაშები აჭარიდან

 

მთავარი ფოტო: ტურისტული პროდუქტების განვითარების სააგენტო

გადაბეჭდვის წესი


ასევე: