მთავარი,სიახლეები

„ხიდი წაიღო, გზა აღარ გვაქვს“ – მეწყერი სხალთაში

08.02.2024 • 3914
„ხიდი წაიღო, გზა აღარ გვაქვს“ – მეწყერი სხალთაში

ხულოში, სხალთის ხეობაში, 8 თებერვალს მეწყერი ჩამოწვა.

„წაბლანის მეწყრის შედეგად ჩამოშლილი მიწის მასა ჩამოწვა მდინარე ფაჩხაში და ღვარცოფი ახალა სხალთის ტაძრის მიმდებარე ტეროტორიაზე მოდის“ – გვითხრა ერთ-ერთმა მოქალაქემ.

„ხიდი წაიღო, გზა აღარ გვაქვს, 3 ოჯახი გაჰყავთ, ვისაც საფრთხე ემუქრება,“ – გვითხრა სოფელ სხალთაში მცხოვრებმა ლევან მახარაძემ.

სოფელ წაბლანაში მცხოვრები დავით შაინიძის თქმით კი, სოფელ წაბლანის ერთი ნაწილი დაიმეწყრა: „ვის სიახლოვესაც ჩამოწვა მეწყერი, დაურეკეს და უთხრეს, რომ უნდა გადავიდეს უსაფრთხო ადგილზე, სხვა მხრივ ჩვენს სოფელში სიმშვიდეა“.

ხულოს მერიის ინფორმაციით, მეწყერი სოფელ ყინჩაურში დარიკო ცეცხლაძისა და ლევან შაინიძის საცხოვრებელი სახლების მიმდებარედ განვითარდა.

„მეწყრული პროცესები ღამის 2 საათიდან დაიწყო და მთელი ღამის განავლობაში გრძელდებოდა. სტიქიის შედეგად არავინ დაშავებულა. მეწყრული კერის არეალში მცხოვრები ოჯახების გაყვანა დროულად მოხერხდა უსაფრთხო ადგილას. მეწყერმა დააზიანი სოფელ ყინჩაურში არსებული სამანქანო ხიდი და მიმდებარე ტერიტორია.

ამ დროისთვის აღნიშნულ მონაკვეთზე საავტომობილო მოძრაობა შეზღუდულია. მოძრაობის აღდგენის მიზნით, მალე დაიწყება საჭირო ღონისძიებები“ – წერს მერია.

მათივე ინფორმაციით, მუნიციპალიტეტის მასშტაბით სხვადასხვა სტიქიური კერიდან 35 ოჯახია გაყვანილი უსაფრთხო ადგილას.

ხულოს მერიის ინფორმაციით, 24-საათიან რეჟიმში მოქმედებს ცხელი ხაზი: 551 00 52 72

გადაბეჭდვის წესი


ასევე: