ბათუმის აეროპორტში შესული ცრუ შეტყობინების გამო ნაღმს ეძებდნენ.
აეროპორტში ნაღმის არსებობის შესახებ შეტყობინება დაახლოებით 17:00 საათისთვის შევიდა.
შეტყობინების მიღებისთანავე აეროპორტში განგაში გამოცხადდა – მგზავრებს და პერსონალს აეროპორტის ტერიტორია დაატოვებინეს.
ნაღმის სამძებრო სამუშაოებში ჩართული იყო პოლიცია და კინოლოგები.
ცრუ შეტყობინების გამო გადაიდო ბათუმი-სტამბოლის ფრენა, რომელიც 17:40 საათზე უნდა შესრულებულიყო.
აეროპორტის წარმომადგენელი „ბათუმელებთან“ ამბობს, რომ ამ დროისთვის სამართალდამცავებმა აეროპორტში მუშაობა დაასრულეს [19:20 საათი], ხოლო პერსონალი და მგზავრები აეროპორტში დაბრუნდნენ.
თურქეთის ავიახაზების დაგვიანებული რეისზე მგზავრთა რეგისტრაცია ცოტა ხანში დაიწყება.
„ბათუმელები“ დაუკავშირდა შსს სამინისტროს. თუმცა ამ ეტაპზე მათგან აეროპორტში მიმდინარე სამძებრო სამუშაოების შესახებ ინფორმაციის მიღება შეუძლებელი აღმოჩნდა.
