დღეს, 8 ივლისს, დასრულდა ბათუმის შოთა რუსთაველის სახელმწიფო უნივერსიტეტის რექტორობის კანდიდატთა რეგისტრაცია.
ბსუ-ს ოფიციალურ ვებგვერდზე გავრცელებული ინფორმაციის მიხედვით, რექტორის არჩევნებზე მხოლოდ ორი კანდიდატი – მერაბ ხალვაში და ანთაზ ქიქავა დარეგისტრირდა.
ანთაზ ქიქავა მონაწილეობდა 2015 წლის 16 მარტის ბსუ-ს რექტორის არჩევნებში. მაშინ აკადემიურმა საბჭომ რექტორის არჩევა ვერ მოახერხა და არჩევნები გადაიდო.
ანთაზ ქიქავამ აბაშიძის დროს აჭარაში კომენდანტის საათი გამოაცხადა.
მერაბ ხალვაში ამჟამად ბსუ-ს რექტორის მოვალეობის შემსრულებელია, იგი ამ თანამდებობაზე მას შემდეგ აირჩიეს, რაც მისმა წინამორბედმა – ყოფილმა რექტორმა,
ალეკო ბაკურიძემ ვადაზე ადრე დატოვა თანამდებობა.
ბსუ-ს რექტორის არჩევნები 2016 წლის 18 ივლისს, 15 საათზე ჩატარდება. არჩევნებში მონაწილეობის მსურველებს რეგისტრაციის გავლა პირველი ივლისიდან 8 ივლისს 17 საათამდე შეეძლოთ.
ბსუ-ს რექტორს უნივერსიტეტის აკადემიური საბჭო ირჩევს 4 წლის ვადით.
