„დღევანდელ წვიმაში ბავშვებთან ერთი საათი ქუჩაში დავრჩი, ვერც წინ მივდიოდი, ვერც უკან, სკოლამდე უნდა მიმეყვანა ბავშვები, მაგრამ პრაქტიკულად ფეხით გასავლელი ადგილი არ იყო არსად,“ – ამბობს „ბათუმელებთან“ თამუნა ბერიძე. ის ბათუმში, ხახულის ქუჩაზე ცხოვრობს.
ხახულის ქუჩაზე მოსახლეობამ საპროტესტო აქცია 2023 წლის 10 ნოემბერს გამართა. აქციაზე მუნიციპალური ტრანსპორტი მოითხოვეს, და, ასევე, ინფორმაცია ბათუმის მერიიდან იმაზე, თუ როდის დასრულდება რეაბილიტაცია ხახულის ქუჩაზე.
ამ ქუჩის ერთ მონაკვეთზე მიმდინარე სარეაბილიტაციო სამუშაოების გამო მოსახლეობას შემოვლითი გზით სარგებლობა უწევს.
„ეს შემოვლითი გზაც ხახულის ქუჩის ნაწილია, მაგრამ არავინ არ საუბრობს მის რეაბილიტაციაზე. წვიმაში განსაკუთრებით ეს ქუჩა წყლის ორმოებითაა სავსე, ავტომანქანებიც ამ გზით დადიან დროებით, ვიდრე ხიდი გადაკეტილია.
ჩვენი მოთხოვნაა, ეს გზა მოაწესრიგონ, რომლითაც ახლა ვსარგებლობთ, როგორც ალტერნატიული გზით და ერთმა ტრაქტორმა მაინც გამოიაროს, ან ავტომანქანებისთვის სხვა შემოვლითი გზა გამოიყენონ. სულ 300 მეტრია ეს ალტერნატიული გზა, მაგრამ წვიმაში გადადგილება კატასტროფაა.
აქციის შემდეგ ხახულის ქუჩის ბოლოდან გადის უკვე ავტობუსი #7, მაგრამ ჯერ ქალაქის ცენტრალურ უბნებს მოივლის და შემდეგ მოვა ე.წ. ხოფის ბაზრობის ტერიტორიაზე, სადაც ჩვენი ბავშვები მე-9 სკოლაში დადიან, სულ პატარა კი, იქვე ბაღში დადის. ამ საცობებში ავტობუსში შეიძლება მთელი დღე დაკარგო, სკოლასაც ასე ადვილად ვერ შეცვლი,“ – გვითხრა თამუნა ბერიძემ.
ხახულის ქუჩის ის მონაკვეთი, რომელსაც ხიდთან ქუჩის ჩაკეტვის გამო მოსახლეობა ალტერნატიულ გზად იყენებს. თამუნა ბერიძის ფოტო
ბათუმში, ხახულის ქუჩაზე მერიის საქალაქო ინფრასტრუქტურისა და კეთილმოწყობის სამმართველომ 2023 წელს დაიწყო სარეაბილიტაციო სამუშაოები. ხელშეკრულება შპს „ბონდი 2009“-თან 30 999 929 ლარზეა გაფორმებული. ხელშეკრულების პირობის მიხედვით, სამუშაოების დასრულების ვადად 2026 წლის მარტია მითითებული და ეს ვადა ორივე ქუჩას ეხება – მამია ვარშანიძის ქუჩაზე სამუშაოები ჯერ არ დაწყებულა.
„ეს მრავალწლიანი პროექტია“- გვითხრეს ბათუმის მერიის კეთილმოწყობის სამმართველოს პრესცენტრში და ვერ დაგვიკონკრეტეს, როდის ჩაუტარებენ რეაბილიტაციას ხახულის ქუჩის იმ მონაკვეთს, რომელზეც მოქალაქე თამუნა ბერიძე საუბრობს.
კეთილმოწყობის სამმართველოს პრესცენტრში განმარტეს, რომ ქუჩის ამ ნაწილის პროექტირება ჯერ არ ჩატარებულა, ხახულის ქუჩის ის მონაკვეთი კი, სადაც ახლა გადაადგილება შეზღუდულია, 2023 წლის ბოლომდე გაიხსნება.
რაც შეეხება ავტობუსს, „ბათუმის ავტოტრანსპორტის“ დირექტორის, ლევან ლაზარიაშვილის თქმით, ქუჩის გადაკეტვის გამო, პრაქტიკულად შეუძლებელია ჯერ რურუას ქუჩაზე გავიდეს ავტობუსი და შემდეგ ქალაქის ცენტრში.
„ეს დროებითი შეზღუდვაა მხოლოდ, ვიდრე გადაკეტილი იქნება ქუჩა, სხვაგვარად შეუძლებელია,“ – უთხრა ლევან ლაზარიაშვილმა „ბათუმელებს“.
