დღეს, 16 ოქტომბერს, საკონსტიტუციო სასამართლოს მოსამართლეებმა ხელი უნდა მოაწერონ დასკვნის ტექსტს, საქართველოს პრეზიდენტის სალომე ზურაბიშვილის იმპიჩმენტის საკითხთან დაკავშირებით. დღეს გაირკვევა მოსამართლეების გადაწყვეტილება, დაარღვია თუ არა სალომე ზურაბიშვილმა კონსტიტუცია.
საკონსტიტუციო სასამართლოს თავმჯდომარემ, მერაბ ტურავამ, ჟურნალისტებთან საუბრისას თქვა, რომ მოსამართლეებს დასკვნით ტექსტზე ხელის მოწერა დღის განმავლობაში შეუძლიათ:
„გადაწყვეტილების გამოცხადების დღეა 16 ოქტომბერი, 16 ოქტომბერი შედგება რამდენიმე საათისგან, ეს იმას ნიშნავს, რომ მოსამართლეები შეიკრიბებიან 12:00 საათის შემდეგ და მოაწერენ ხელს გადაწყვეტილებას.
ამის შემდეგ ორი საათი სჭირდება იმას, რომ გამოსაცხადებლად მომზადდეს გადაწყვეტილების ტექსტი, ექსპერტიზა მომზადდეს სამართლებრივ დეპარტამენტში და როცა გამოცხადდება, რამდენიმე საათში დღის განმავლობაში გამოქვეყნდება“ – ამბობს მერაბ ტურავა.
მერაბ ტურავა მედიასთან არ საუბრობს საკუთარ გადაწყვეტილებაზე. მისი თქმით, დასკვნის გამოქვეყნებამდე მისი პოზიციის გაჟღერება კანონდარღვევა იქნებოდა.
მისი თქმით, სასამართლო განხილვა არ იყო დაკავშირებული „განსაკუთრებულ სირთულეებთან“ და მოსამართლეებმა ისეთი გადაწყვეტილება მიიღეს, „როგორიც უნდა მიეღოთ“.
მერაბ ტურავა ამბობს, რომ შესაძლოა ხელმოწერამდე შეცვალოს მოსამართლემ თავისი გადაწყვეტილება, ამიტომ წინასწარ რაიმეს თქმა შეუძლებელია.
„ყველაფერი დამოკიდებულია კონკრეტული მოსამართლის ხელმოწერაზე. ერთსულოვნებაა თუ არა მოსამართლეებში, ამაზე კომენტარის გაკეთება არ შეიძლება. ჩვენ ვითათბირეთ, შევთანხმდით, რომ დღეს აუცილებლად მოეწერება ხელი და შემდეგ გამოცხადდება დარბაზში.
დასკვნას გადავაგზავნით პარლამენტში და ავტვირთავთ ვებგვერდზე“ – ამბობს ტურავა.
სალომე ზურაბიშვილის წინააღმდეგ საკონსტიტუციო სასამართლოში სარჩელი „ქართულმა ოცნებამ“ შეიტანა.
მმართველი პარტია პრეზიდენტს ევროპაში ვიზიტების გამო უჩივის და აცხადებს, რომ ზურაბიშვილი ევროპის ქვეყნების ლიდერებს მთავრობასთან შეთანხმების გარეშე ხვდებოდა.
ამავე თემაზე:
„რას ვაკეთებთ აქ?“ – ჩუგოშვილის შეკითხვა კობახიძეს იმპიჩმენტის საქმეზე
