ბათუმის რუსთაველის სახელმწიფო უნივერსიტეტი [ბსუ] ლეონიძის ქუჩაზე, სადაც საუნივერსიტეტო კლინიკის აშენებას გეგმავდა, სამედიცინო მიმართულების სასწავლო კორპუსს ააშენებს.
უნივერსიტეტის ინფორმაციით, ახალი კორპუსის მშენებლობის სავარაუდო ღირებულება 8 880 630 ლარია, რაც აჭარის ბიუჯეტიდან დაიფარება.
სასწავლო კორპუსის მშენებლობის სამუშაოების მრავალწლიან [2023-2026 წწ] შესყიდვას ბსუ ელექტრონული ტენდერით გეგმავს, რისთვისაც, პრეტენდენტთა გამოცდილების განსაზღვრის მიზნით, ბაზარს იკვლევს.
ბსუ-ს ჯანდაცვის ფაკულტეტის სასწავლო კორპუსი ბათუმში, ლეონიძის ქუჩა N15-ში უნდა აშენდეს.
ამ ტერიტორიაზე ბსუ არაუმეტეს 120 საწოლზე გათვლილი საუნივერსიტეტო კლინიკის მშენებლობას გეგმავდა, რისთვისაც პროექტირებაზე ტენდერი 2021 წლის დეკემბერში 100 ათასი ლარით გამოაცხადა.
აღნიშნულ ტენდერში გამარჯვებულად შპს „ვეგა+“ გამოაცხადეს, რომელთანაც ბსუ-მ ხელშეკრულება 2021 წლის 30 დეკემბერს 85 ათას ლარზე გააფორმა.
ხელშეკრულების გაფორმებიდან დაახლოებით ორ თვეში კი, ეს ხელშეკრულება მხარეთა ურთიერთშეთანხმებით შეწყდა.
როგორც დოკუმენტებიდან ჩანს, ხელშეკრულების შეწყვეტის მთავარი საფუძველი საბუნებისმეტყველო მეცნიერებათა და ჯანდაცვის ფაკულტეტის დეკანის სამსახურეობრივი ბარათი იყო.
დეკანი რექტორს წერდა, რომ „ამ ეტაპზე მიღწეული შეთანხმების თანახმად, იგეგმება ბათუმის რესპუბლიკური საავადმყოფოს შოთა რუსთაველის სახელმწიფო უნივერსიტეტის სასწავლო ბაზად გარდაქმნა…“
აქედან გამომდინარე კი, „მოცემულ ეტაპზე აღარ არსებობს საჭიროება უნივერსიტეტმა განახორციელოს საუნივერსიტეტო კლინიკის მშენებლობა და ბიუჯეტით გამოყოფილი თანხა მიზანშეწონილია მოხმარდეს საუნივერსიტეტო კლინიკის მატერიალურ-ტექნიკური ბაზის გაუმჯობესებას.“
დეკანის წერილი 2022 წლის 9 მარტითაა დათარიღებული. „ვეგა+“-თან კი, ბსუ-მ ხელშეკრულება ორ დღეში, 11 მარტს შეწყვიტა.
ბათუმის რესპუბლიკურ საავადმყოფოში „ბათუმელებს“ უთხრეს, რომ ბსუ-სთან ამ ეტაპზე გაფორმებული აქვთ ხელშეკრულება, რომლის მიხედვითაც „ვართ აფილირებული საუნივერსიტო კლინიკა. მოდიან უნივერსიტეტის პროფესორ-მასწავლებლები, სტუდენტები, გვაქვს შესაბამისი კათედრა, აუდიტორია, რაც მოითხოვა ბსუ-მ და ტარდება ლექცია-სემინარები ამ აუდიტორიებში.“
„რესპუბლიკურში“ ასევე გვითხრეს, რომ აფილირება ეს არის ერთ-ერთი ფორმა საუნივერსიტეტო კლინიკის. არის კიდევ მეორე, როცა უნივერსიტეტს აქვს საკუთარი კლინიკა, და მესამე, როცა უნივერსიტეტი თავად ფლობს კლინიკაში წილებს.
ბათუმის რესპუბლიკური კლინიკური საავადმყოფოს 100 პროცენტი წილის მფლობელი აჭარის ავტონომიური რესპუბლიკაა, თუმცა, საავადმყოფო მართვის უფლებით სამედიცინო ჰოლდინგზეა გადაცემული.
საუნივერსიტეტო კლინიკის პროექტირებაზე დადებული ხელშეკრულების შეწყვეტიდან დაახლოებით ოთხ თვეში, 2022 წლის ივლისში, ბსუ-მ ახალი ტენდერი გამოაცხდა.
ამჯერად „ქალაქ ბათუმში ლეონიძის ქუჩა N15-ში ბსუ-ს სამედიცინო მიმართულების სასწავლო კორპუსის მშენებლობის დეტალური საპროექტო-სახარჯთაღრიცხვო დოკუმენტაციის შედგენაზე“.
ამ ტენდერშიც შესყიდვის სავარაუდო თანხა 100 ათასი ლარი იყო. მონაწილეობა ორმა კომპანიამ მიიღო, რომელთა შეთავაზებული ფასები საგრძნობლად განსხვავდებოდა ერთმანეთისგან.
შპს „არქ ჯგუფი“ ბსუ-ს მომსახურებას 80 000 ლარად სთავაზობდა, შპს „აკეთი 2017“ კი – 47 777 ლარად. ხელშეკრულება სწორედ ამ უკანასკნელთან გაფორმდა 2022 წლის აგვისტოში.
სწორედ „აკეთი 2017“-ის მიერ მომზადებული პროექტით უნდა ააშენონ ბსუ-ს ჯანდაცვის ფაკულტეტის შენობა ლეონიძის ქუჩაზე, რისთვისაც უნივერსიტეტი ტენდერს გამოაცხადებს.
თავიდან ბსუ-ს ჯანდაცვის ფაკულტეტის შენობა 4-სართულიანი უნდა ყოფილიყო და ასეც უნდა დაპროექტებულიყო:
თუმცა, შემდეგ ხელშეკრულებაში შევიდა ცვლილება, სახელშეკრულებო თანხა [47 777 ლარი] იგივე დარჩა, თუმცა 4-ის ნაცვლად 3-სართულიანი შენობა დააპროექტეს:
ბსუ-ს ჯანდაცვის ფაკულტეტის კორპუსი / რენდერი პროექტიდან
