ჰონგ კონგის დროშის ქვეშ მცურავმა საკონტეინერო გემმა Joseph Schulte-მ დღეს ოდესის პორტი დატოვა. ამის შესახებ უკრაინული მედია წერს. გემი მიემართება თურქეთში, ამბარლას პორტში და გადააქვს 30 000-ზე მეტი ტონა ტვირთი, მათ შორის საკვები. ეს პირველი გემია, რომელმაც ოდესის პორტი დატოვა 16 ივლისის შემდეგ, რაც რუსეთმა განაცხადა, რომ მარცვლეულის შეთანხმება შეაჩერა.
ზოგადად, ეს გემი 2022 წლის 23 თებერვლიდან იდგა ოდესის პორტში.
ეს არის პირველი გემი, რომელმაც კომერციული გემებისთვის შექმნილი შავი ზღვის უსაფრთხოების დროებითი კორიდორი გამოიყენა ოდესის პორტიდან. ამის შესახებ უკრაინის მუნიციპალიტეტების, ტერიტორიისა და ინფრასტრუქტურის განვითარების მინისტრმა, ალექსანდრე კუბრაკოვმა განაცხადა.
Joseph Schulte მოძრაობს სამოქალაქო გემებისთვის შექმნილი დროებითი დერეფნის გავლით უკრაინის შავი ზღვის საზღვაო ნავსადგურებში.
უკრაინის ცნობით, გემი გავიდა ვორონცოვის შუქურიდან და გაემართა ბოსფორისკენ. ბორტზე – 30 ათასზე მეტი ტონა ტვირთი (2114 კონტეინერი), საკვების ჩათვლით. დერეფანი ძირითადად გამოყენებული იქნება იმ გემების ევაკუაციისთვის, რომლებიც იმყოფებოდნენ უკრაინის პორტებში – ჩერნომორსკში, ოდესასა და იუჟნიში რუსეთის სრულმასშტაბიანი შეჭრის დროს – იუწყება მინისტრი.
