ბათუმში მცხოვრები შშმ მოქალაქე ომარ როდონაია ისევ საცხოვრებელს ეძებს. მას ისევ უთხრეს, რომ სხვისი საკუთრება უნდა დატოვოს. ბოლო წლებში სოფელ ქვედა განახლებაში, კერძო სახლში, ნაქირავებ ოთახში ცხოვრობდა. ახლა, ახალი საცხოვრებლის პოვნამდე ცოტა დრო აქვს და არ იცის სად წავიდეს: „სხვაგან უნდა გადახვიდეო მითხრა დიასახლისმა“.
ომარ როდონაია გვიყვება, რომ ახლა მისი შემოსავალი პენსია, 175 ლარი და სახელმწიფოს მიერ შშმ პირისთვის დანიშნული დახმარება – 60 ლარია. ჯამში 235 ლარი.
ამჯერად საცხოვრებლის მოთხოვნით მან ბათუმის საკრებულოს მიმართა. ომარ როდონაია პარასკევს, 21 ივლისს საკრებულოს შენობაში იმ დროს მივიდა, როცა სხდომაზე განსახილველი საკითხები ამოწურეს და ბიუჯეტში ცვლილების მოთხოვნის განხილვაზე გადავიდნენ.
ომარ როდონაია შენობის ფოიეში იცდიდა იმ იმედით, რომ გამოჩნდებოდა ვინმე, ვინც მას დამაიმედებელ პასუხს გასცემდა. დაცვამ ის სხდომათა დარბაზში არ შეუშვა – „საშვი აიღე და შეგიშვებთო“.
ლოდინით რომ დაიღალა, ომარ როდონაიამ პოლიცია გამოიძახა. პოლიციელმა მას ჰკითხა, რაში სჭირდებოდა პოლიციის დახმარება. მას აუხსნეს, რომ ერთადერთი რაც შეეძლოთ, მისი თავშესაფარში გადაყვანა იყო.
– „თავშესაფარში არ მინდა, ვყოფილვარ იქ. თქვენი კომპეტენცია მარტო დაჭერა ხომ არ არის, არა?!“
– „თავშესაფარში თუ არ გინდათ, დაგემშვიდობებით“ – უთხრეს მას და რამდენიმეწუთიანი საუბრის შემდეგ პოლიციამ შენობა დატოვა.
ომარ როდონაიას მოთხოვნის შესახებ სხდომაზე საკრებულოს წევრმა, აკაკი გვიანიძემ გააკეთა განცხადება, მას შემდეგ, რაც სხდომაზე ერთ-ერთი სამშენებლო პროექტის გენგეგმა დაამტკიცეს. ეს გენგეგმა მომავალში მერიისთვის ბინების გადაცემასაც ითვალისწინებს.
ბათუმის მერია კონკრეტული სამშენებლო პროექტების კოეფიციენტის შეთანხმებისას საკომპენსაციოდ სწორედ სოციალურ ფონდში ჩასარიცხ ფართობებს ითხოვს.
„რადგან ვამბობთ, რომ ბინები რჩება მერიას და ეს ძალიან დიდი სიკეთეა, ქვემოთ იცდის მოქალაქე, რომელიც ცხრა წლის განმავლობაში მერიის შენობაში დადის თითქმის ყოველ კვირა, შშმ პირი ომარ როდონაია, რომელსაც ალბათ ბევრი თქვენგანი იცნობს. ფიზიკურად ვერ მოხერხდა მისთვის ერთი პატარა ბინის გამოძებნა, რომელსაც საკუთრებაშიც არ ითხოვს, უნდა, რომ სიცოცხლის ბოლომდე იცხოვროს ნორმალურ, ღირსეულ პირობებში…“
კოლეგას საკრებულოს თავმჯდომარემ უპასუხა, არა მგონია, როდონაიას ჩემზე უკეთ ვინმე იცნობდესო:
„და თუ ვინმეს დახმარების ხელი გაუწოდებია, არ მინდა ახლა საუბარი… ჩვენ სარეზერვო ფონდიდანაც დავეხმარეთ. რაც შეეხება საბინაო პროგრამას, რაც მერიას აქვს, უნდა აკმაყოფილებდეს პროგრამის მოთხოვნებს. ვიცი ეს პიროვნება და თუ რამე იქნება და რაიმე დახმარება შეუძლია საკრებულოს, ჩვენ ყველანი მზად ვართ“ – განაცხადა რამაზ ჯინჭარაძემ.
საკრებულოს თავმჯდომარემ უსახლკაროთა რეგისტრაციის პროგრამაც გაიხსენა და თქვა, რომ პროგრამა სწორედ იმისთვის შეიქმნა, რომ მერიას სრული ინფორმაცია ჰქონდეს, შემდეგ კი მოქმედების გეგმას შეიმუშავებენ.
ომარი ამბობს, რომ სხვის სახლში ცხოვრება აღარ უნდა. ამბობს, რომ ითხოვს ყველაზე მცირეს, ერთ ოთახს არა საკუთრებაში, არამედ სიცოცხლის ვადით, სხვის სახლში რომ აღარ იცხოვროს.
„რამდენ ხანს შეიძლება ასე ცხოვრება გაგრძელდეს?- არაფერი არ იცვლება“ – გვითხრა მან.
ომარ როდონაიას შესახებ სტატია „ბათუმელებმა“ 2015 წელს გამოაქვეყნა. სტატიას, რომელშიც აღწერილი იყო ომარ როდონაიას მძიმე საცხოვრებელი პირობები, მოქალაქეების მხრიდან დიდი გამოხმაურება მოჰყვა. სწორედ მაშინ დაუქირავეს მას ბინა დახმარების მსურველებმა. დღემდე სწორედ ეს ადამიანები იხდიან ომარ როდონაიას ბინის ქირას.
ამავე თემაზე:
