ბათუმის მერია გვატყობინებს, რომ 2023 წლის 13 ივლისს, 13:00 საათზე, ბათუმის მერიის შენობაში შპს „ამბასადორი ბათუმი აილენდის“ ხელოვნური კუნძულის პროექტის განხილვაა დანიშნული. საჯარო განხილვის ორგანიზატორი სსიპ გარემოს ეროვნული სააგენტოა.
საჯარო განხილვა ღიაა, მასში მონაწილეობა, ასევე შენიშვნებისა და მოსაზრებების წარდგენა, ნებისმიერ პირს შეუძლია.
ამ განცხადებას ბათუმის მერია საკუთარ ვებგვერდზე ავრცელებს.
მერია ასევე წერს:
„წარმოდგენილ სკოპინგის დოკუმენტაციასთან დაკავშირებით წერილობითი შენიშვნები და მოსაზრებები შეგიძლიათ წარუდგინოთ სსიპ გარემოს ეროვნულ სააგენტოს 2023 წლის 17 ივლისის ჩათვლით, მისამართზე: თბილისი, მარშალ გელოვანის გამზირი N34 ან ელფოსტის მისამართზე: eia@mepa.gov.ge . შენიშვნის/მოსაზრების ელფოსტაზე გამოგზავნისას უნდა მიუთითოთ შემდეგი ადრესატი: სსიპ გარემოს ეროვნულ სააგენტო.
ამასთან, დამატებით წარმოდგენილი დოკუმენტაციის ნაბეჭდი/მატერიალური ვერსია ასევე ხელმისაწვდომია სსიპ გარემოს ეროვნულ სააგენტოში“.
„გარემოსდაცვითი შეფასების კოდექსის“ თანახმად, სკოპინგის დასკვნის მიმღებ უფლებამოსილ ორგანოს წარმოადგენს სსიპ გარემოს ეროვნული სააგენტო.
ეს განცხადება საჯარო გაცნობისთვის ბათუმის მერიის ვებგვერდზეა გამოქვეყნებული, ოღონდ არა განცხადებების ნაწილში, არამედ რუბრიკაში – „საჯარო განხილვა“. არადა, განცხადებები ბევრად უფრო ხილვადია. ინფორმაცია ხელოვნური კუნძულის პროექტის განხილვის შესახებ არც მერიის ფეისბუქის გვერდზეა გამოქვეყნებული, მიუხედავად იმისა, რომ მერიის გვერდზე, ფეისბუქზე, თითქმის ყოველდღიურად ქვეყნდება მერიის სიახლეები.
გარდა ამისა, განცხადებაში მითითებული არ არის, სად უნდა ვიპოვოთ პროექტი, რომ მას გავეცნოთ.
იმ შემთხვევაში, თუ მოქალაქეს არ აქვს ინფორმაცია სკოპინგის [სკოპინგი – პროექტის გარემოზე ზემოქმედების ანგარიშები, რაც ითვალისწინებს შესაბამის კვლევებს] ანგარიშისა და მასთან დაკავშირებული ანგარიშების წარდგენის ვალდებულების შესახებ, ის ხელოვნურ კუნძულთან დაკავშირებული დოკუმენტების პოვნას და მის გაცნობას ვერ შეძლებს.
თუ პროექტი საჯარო არ არის, შენიშვნები და მოსაზრებები დაინტერესებულმა პირებმა რაზე უნდა წარადგინონ? – რაც შეეხება სკოპინგის დოკუმენტს, მერიას შეეძლო მინიმუმ ლინკი მიეთითებინა – სად დევს გარემოს დაცვითი შეფასება, თუმცა, როგორც ჩანს, თვითმმართველობის აღმასრულებელი ორგანო ამჯერადაც მოვალეობის მოხდით შემოიფარგლა, მერე დაინტერესებულ პირებს რომ უთხრას: „როგორ არა, გამოქვეყნებული მქონდა, შესულიყავით და გენახათ“.
მერიას საჯარო ინფორმაციის მიუწოდებლობისთვის ბათუმის საკრებულოს წევრი რეზო ხარაზიც ადანაშაულებს. მან ამასთან დაკავშირებით განცხადება გუშინ, 27 ივნისს, საკრებულოს სხდომაზე გააკეთა და დახმარება საკრებულოს თავმჯდომარეს სთხოვა:
„3 თვეზე მეტია ოფიციალურად გამოთხოვილი მაქვს საჯარო ინფორმაცია და არ მაძლევენ“.
ამავე სხდომაზე ორი სამშენებლო პროექტის დეტალური გეგმა და ერთი პროექტის კონცეფცია დაამტკიცეს. საკრებულოს ვებგვერდზე ამ პროექტებთან დაკავშირებულ საკითხებს მხოლოდ დადგენილების პროექტები და განმარტებითი ბარათები ახლდა, კონცეფცია და გენგეგმები კი თანდართული არ ყოფილა.
ამ პრობლემაზე საკითხების მომხსენებელს მერიის ურბანული პოლიტიკისა და ქალაქმშენებლობის სამსახურის უფროსს საკრებულოს წევრმა აკაკი გვიანიძემაც მიმართა სხდომაზე:
„მეუბნებიან, რომ გენგეგმები და კონცეფციები ატვირთული არ არის“.
მოგვიანებით მერიაში „ბათუმელებს“ უთხრეს, რომ დოკუმენტები მერიის ვეგვერდზეა ატვირთული, ამის დასადასტურებლად კი ჩამონათვალი კომპიუტერის დესკტოპზეც გვაჩვენეს. თუმცა გადამოწმების შემდეგ აღმოჩნდა, რომ მართალია, დოკუმენტების სათაურები არის, თუმცა მათ გაცნობას მაინც ვერ შეძლებთ, ბმულებზე დაკლიკებისთანავე გადადიხართ სხვა ველზე, სადაც კითხულობთ, რომ დოკუმენტებზე წვდომა უნდა მოითხოვოთ.
წვდომას კი არავინ მოგცემთ და არც იმაზე გიპასუხებთ, რატომ ხდება ასე.
