„ანწუხელიძე გმირია“ – ამ და სხვა ტრანსპარანტებით დღეს, 16 ივნისს, აჭარის მთავრობის ადმინისტრაციულ შენობასთან ენმ-ს ახალგაზრდულმა ორგანიზაციამ და „ალტერნატივამ“ აქცია გამართეს. აქციის მონაწილეები თორნიკე რიჟვაძის მიერ უმაღლეს საბჭოში გამოთქმულ განცხადებას გამოეხმაურნენ:
„…გაზრდილია ვიზიტორთა რაოდენობაც და ამ ხვედრით წილში, მათ შორის იმ ქვეყნის მოქალაქეებიცაა, რომლებსაც 2008 წელს, ლაჩრულად წაგებული ომის შემდგომ, სააკაშვილის ხელისუფლებამ მწვანე აუნთო“-განაცხადა თორნიკე რიჟვაძემ.
„თორნიკე რიჟვაძის ეს განცხადება მოღალატეობრივთან ერთად არის შეურაცხმყოფელი. იგი შეურაცხყოფას აყენებს ომში დაღუპულ გმირებს, მათი ოჯახის წევრებს. ჩვენ გვინდა ვუთხრათ თორნიკე რიჟვაძეს, რომ ომი ჯერ არ დასრულებულა და იგი არც 2008 წლის აგვისტოში არ დაწყებულა – ომი გაცილებით ადრე დაიწყო რუსეთის შემოჭრით საქართველოს სუვერენულ ტერიტორიაზე და დღეს გრძელდება უკრაინაში, სადაც აგრეთვე იღუპებიან ქართველი გმირები,“ – აღნიშნა ლაშა კომახიძემ, ქობულეთის საკრებულოს წევრმა ოპოზიციიდან.
აქციის მონაწილეებმა თორნიკე რიჟვაძეს პოლიტიკური პასუხისმგებლობის აღება და თანამდებობის დატოვება მოსთხოვეს.
„ომი არ დასრულებულა, ანწუხელიძე გმირია – როგორც ჩანს, ეს თორნიკე რიჟვაძისთვის არც მამამისს აუხსნია, რომელიც აგვისტოს ომის მონაწილეა. საინტერესოა, მამამისზეც იგივე დამოკიდებულება აქვს?“ – განაცხადა აქციაზე ნიკა ქაშიბაძემ.
„ეს იყო სილის გაწვნა იმ ღირსეული ადამიანებისთვის, რომლებიც ამ ქვეყანას შეეწირნენ. რა თქმა უნდა, ეს იყო სრულიად საქართველოს და მისი ისტორიის შეურაცხყოფა. ომი არ დასრულებულა და ისტორია განსჯის ამ მოვლენებს, როცა ეს ომი ლოგიკურ დასასრულამდე მივა,“ – თქვა მან.
