ხულოს სოფელ დიოკნისში, ტყესთან ახლოს 103 წლის ზულბიე ძირკვაძე ცხოვრობს, რომელიც თავს სოფელში ყველაზე დაფასებულ ქალს უწოდებს ასაკის გამო. „ჩემი ტოლი ამ სოფელში აღარავინაა. მთელი სოფელი მაფასებს და ყველა მემადლიერება“ – ამბობს ზულბიე.
ზულბიე პოპულარული მზარეული იყო და ხშირად იწვევდნენ ქორწილისა თუ სხვა მნიშვნელოვანი დღესასწაულის მთავარი კერძების მოსამზადებლად. ასევე, იყო ექიმბაშიც. ამბობს, რომ წამლებს ამზადებდა დამწვრობისა და სხვადასხვა დაზიანებებისთვის.
„ყველას ძალიან მოსწონდა ჩემი გაკეთებული საჭმელები. თავის ქებად გამოსდისო, იტყვიან, მაგრამ არა, ნამდვილად ასე იყო. ყველაფერს ვაკეთებდი როცა ახალგაზრდა ვიყავი. ახლა აღარ შემიძლია, ძლივს დავდივარ. 104-ე წელიწადის ათვლა დავიწყე. ყველაფერი მესმის და არაფერი მავიწყდება.
ზულბიე ძირკვაძე
პირველ იანვარს ვარ დაბადებული. გავარდა მაშინ ბებია, ახარა ყველას, ამ ახალ წელს გოგო შეგვეძინაო. დიდებულად გაზრდილი გოგო ვარ. განსაკუთრებით მიყვარს ახალი წელი, ყოველთვის დიდი სამზადისით აღვნიშნავდით“, – გვეუბნება ზულბიე.
ქალის თქმით, სკოლაში ძალიან კარგად სწავლობდა და მამას უნდოდა რაიმე პროფესია ჰქონოდა, მაგრამ ზულბიეს დედა მალე გარდაეცვალა და ოჯახის საქმეების საკუთარ თავზე აღება მოუწია.
ამის შემდეგ ზულბიე მალევე დაქორწინდა. მას სამი შვილი ჰყავს. მისი თქმით, მიუხედავად იმის, რომ იმ დროს თითქმის ყველას ოჯახი მრავალშვილიანი იყო, მას არ უნდოდა ბევრი შვილი ჰყოლოდა.
ზულბიე იხსენებს, რომ ბევრი ბოსტნეული მოჰყავდა და მისი ბოსტანი ყოველთვის კარგად მოვლილი იყო: „მეზობელმა ქალებმა მომიმღერეს კიდეც: ბოსტანში გავიხედეთ, ქინძი სჯობდა კამასო…“
103 წლის ქალი გვეუბნება, რომ არ არის საჭმელი, რომელიც არ უყვარს: „ყველაფერს ვჭამ. არაფერზე ვიტყვი, არ მინდა-მეთქი, მაგრამ ისე, ხორცი განსაკუთრებით მიყვარს“.
ქალი იხსენებს ბავშვობასა და ახალგაზრდობაში გამოვლილ რთულ სოციალურ მდგომარეობასაც: „პური არ იყო მაშინ, თვალით ვერ დაინახავდი. მჭადი. მჭადს ვჭამდით სულ. სადმე, ხულოში თუ წახვიდოდი და ერთ „ბუხანკა“ პურს იყიდდი, ეს იყო.
სკოლაში ტყლაპ-ტყლუპ, ქალამნებით დავდიოდით სულ. თუ დარი იყო, გვიმართლებდა. ავდარში რომ მოვიდოდით და დედა გაგვხდიდა, სულ სველი გვქონდა ფეხები“.
ზულბიე ადრიან დილას იღვიძებს და ბევრს სეირნობს ეზოში, რადგან ძალიან უყვარს ბუნება.
ამბობს, რომ ძალიან უყვარდა მუსიკა, ბავშვობისას, თანატოლებთან ერთად პიესებსაც დგამდა და დასძენს, „ერთი ეგ იყო – ცეკვა არ ვიცოდიო“.
ზულბიე ჩვენთან საუბრისას ხელზე ხშირად ამოწმებდა და ატრიალებდა ბეჭედს. საუბრის ბოლოს გვითხრა, ეს ბეჭედი შვილთაშვილმა მაჩუქაო. მას 9 შვილიშვილი და 20 შვილთაშვილი ჰყავს.
ზულბიე სამ თაობასთან ერთად
