ეროვნული სატყეო სააგენტო და გარემოსდაცვითი ზედამხედველობის დეპარტამენტმა დღეს, 16 მაისს, განცხადება გაავრცელა სურამში, ბაიანთხევის დასახლებაში, კერძო პირის მიერ სახლამდე მისასვლელი გზის, მათ შორის, ხეების თვითნებურად ჩაბეტონების ფაქტზე.
გარემოსდაცვითი ზედამხედველობის დეპარტამენტი აცხადებს, რომ 11 მაისს ბაიანთხევის დასახლებაში სახელმწიფო ტყის ფონდის თვითნებურად დაკავების რამდენიმე ფაქტი გამოავლინეს.
„ფაქტის შესწავლით დადგინდა, რომ დაბეტონებული ტერიტორიის ნაწილი – 267 კვ.მ. წარმოადგენს სახელმწიფო ტყის, ხოლო – 117 კვ.მ. მუნიციპალურ ტერიტორიას.
ამ ეტაპზე ტერიტორიაზე მიმდინარეობს ბეტონის ფენის მოხსნა, რის შემდეგაც შევისწავლით გარემოზე მიყენებულ ზიანს – მიწის დეგრადაციისა და ნაყოფიერი ფენის შესწავლის შესაბამისად დაანგარიშდება ზარალი.
უნდა აღინიშნოს, რომ 11 მაისის მდგომარეობით, თვითნებურად დაკავებულ ტერიტორიებზე არ ფიქსირდებოდა სამუშაოების, კერძოდ, ბეტონის დასხმის არანაირი კვალი. სამართალდამრღვევმა აღნიშნული ტერიტორიის ბეტონით დაფარვის სამუშაოები 12-14 მაისს (უქმეებზე) განახორციელა“ – წერს გარემოს ზედამხედველობის სამსახური.
15 მაისს სოციალურში ქსელში გავრცელდა ჩაბეტონებული წიწვოვანი ხეების კადრები. მედიის დაინტერესების შემდეგ, ხაშურის მერის წარმომადგენელმა „ბათუმელებს“ უთხრა, რომ სიტუაციას შეისწავლიდნენ.
დღეს, 16 მაისს, ზედამხედველობის სამსახურმა თავად გაავრცელა კადრები, რომლებზეც ასახულია ჩაბეტონებული ხეების ირგვლივ საფარის აყრის პროცესი. თუმცა ზედამხედველობის სამსახური არ აკონკრეტებს, ვისი ხარჯით მიმდინარეობს ბეტონის აყრა აღნიშნული ტერიტორიიდან.
ინფორმაციის დაზუსტების შემთხვევაში მასალა განახლდება. ზედამხედველობის სამსახურში ჯერჯერობით „ბათუმელების“ სატელეფონო ზარს არ უპასუხეს.
![ბათუმის მწვანე კუნძულები – გასეირნება სკვერებსა და პარკებში [ვიდეო]](https://batumelebi.netgazeti.ge/wp-content/uploads/2020/06/1-12.jpg)
