წამალი ბავშვებს – ამ მოთხოვნით აქცია გაიმართება ბათუმში ხვალ, 29 აპრილს, დღის 3 საათზე.
აქონდროპლაზიის მქონე ბავშვების მშობლები რამდენიმე დღეა უწყვეტ რეჟიმში საპროტესტო აქციებს მართავენ პარლამენტის წინ. მშობლები მოითხოვენ, სახელმწიფომ შემოიტანოს წამალი „ვოზორიტიდი“, რომელსაც უკვე მინიჭებული აქვს FDA-სა და EMA-ს ოფიციალური ლიცენზიები.
მშობლების თქმით, ეს წამალი არის ერთადერთი და უალტერნატივო მედიკამენტი მსოფლიოში, რომელიც აქონდროპლაზიით დაავდებულ ბავშვებს ზრდაში ეხმარება.
აქონდროპლაზია იშვიათი დაავადება, რომელიც მსოფლიოში 25000-ში ერთ ახალშობილს უვლინდება. დაავადება გამოიხატება ტანდაბლობით და მასთან არსებული ჯანმრთელობის უამრავი პრობლემით.
საქართველოში აქონდროპლაზიის მედიკამენტი 13 ბავშვს სჭირდება, აქედან 10-ს დაუყოვნებლივ.
მედიკამენტი ლიცენზირებულია ევროკავშირსა და ამერიკაში. თუმცა, ჯანდაცვის სამინისტრო ამბობს, რომ არ არსებობს საკმარისი კვლევები ამ წამალზე.
აქონდროპლაზიის მქონე ბავშვებს და მათ მშობლებს საზოგადოების სოლიდარობა სჭირდებათ. სწორედ ამ მიზნით გაიმართება აქცია 29 აპრილს, ბათუმში, ევროპის მოედანზე.
