საქართველოს განათლების ახალი მინისტრი, გიორგი ამილახვარი თბილისთან ახლოს, სოფელ შინდისში, მირიან მეფის ქუჩაზე, ფეშენებელურ სახლს იშენებს. უკვე ყოფილი დეპუტატისა და მოქმედი მინისტრის ქონებრივი დეკლარაციის მიხედვით, გასულ წელს ამ სახლის სამშენებლო სამუშაოებში მის მეუღლეს 350 000 ლარი დაუხარჯია.
2314 კვ.მეტრი მიწის ნაკვეთი სამშენებლოდ სოფელ შინდისში გიორგი ამილახვარს 2021 წელს 798 000 ლარად შეუძენია.
პროექტის მიხედვით, გიორგი ამილახვარი იშენებს სამსართულიან სახლს ერთი მიწისქვეშა და ორი მიწისზედა სართულით. პროექტი ითვალისწინებს ტერასის, დამხმარე ფართობის, საუნისა და სპორტული მოედნის მოწყობასაც.
პროექტის განაშენიანების ფართობი 1677 კვ.მეტრია: საერთო ფართობი 1440.7 საცხოვრებელი ფართობი 913.9, საზაფხულო ფართობი 380.5 …
პროექტის რენდერი – პროექტი ითვალისწინებს აუზის და სპორტული მოედნის მოწყობას.
შესასვლელი- რენდერი
პროექტის მიხედვით, შენობა უნდა აშენდეს რკინა-ბეტონის კარკასითა და ფართო ვიტრაჟებით, კედლები დეკორატიული ბეტონის ფაქტურით, ნაწილობრივ ფასადის კერამიკული ქვით უნდა მოეწყოს.
განათლების ახალი მინისტრი და მისი მეუღლე კიდევ რამდენიმე საცხოვრებელს ფლობენ. მათ შორის, გიორგი ამილახვარი ფლობს ბინას მანსარდით თბილისში, ყაზბეგის ქუჩაზე, ორივე ფართობი ჯამში 277 კვ.მეტრია. იმავე მისამართზე მის საკუთრებაშია სარდაფიც – 31 კვ.მეტრი, როგორც დეკლარაციაში მიუთითა, ეს ქონება მისთვის 2006 წელს უჩუქებიათ.
ყაზბეგის ქუჩაზე ამილახვარი ფლობს ასევე არასაცხოვრებელ ფართობს, 76 კვ, მეტრს – ეს ფართობი მას 2018 წელს შეუძენია.
2011 წელს გიორგი ამილახვრის მეუღლეს თბილისში, ამაღლების ქუჩაზე, შეუძენია ბინა [196,91 კვ.მ] დამხმარე ფართობი და ორი ავტოფარეხი [ჯამში 50 კვ.მ., თავისივე დეკლარაციაში გიორგი ამილახვარი შენიშვნის სახით წერს, რომ ეს ბინა მეორე სართულის და ტერასის ჩათვლით, ჯამში 390,34კვ.მეტრია. ამაღლების ქუჩაზე შეძენილ ქონებაში ამილახვრის მეუღლეს ერთობლივად 540 000 ლარი გადაუხდია.
გიორგი ამილახვრის მეუღლე შპს „თოუ დეველოპმენტის“ ასი პროცენტის მფლობელი და დირექტორია. რეესტრის მონაცემებით, ამ კომპანიას 2013 წელს, მისი დაფუძნების დღიდან, თავად გიორგი ამილახვარი ხელმძღვანელობდა, შემდეგ კი ის მართვაში მეუღლეს გადასცა.
პარლამენტარის მეუღლე არის ასევე შპს „ნიმის“ და „ნიმი 1“ – ის დირექტორი, ამ კომპანიებს გიორგი ამილახვარი ფლობს.
გასულ წელს ამილახვრის მეუღლემ 600 000-ზე მეტი ლარი გამოიმუშავა, თავად ამილახვრის, როგორც პარლამენტის განათლების კომიტეტის თავმჯდომარის შემოსავალი 53 501 ლარი იყო. გარდა ამისა, მას, შემოსავლის სახით, 12 388,71 ლარი მიუღია არასაცხოვრებელი ფართობის გაქირავებიდან.
- საათები და სხვა ძვირადღირებული ნივთები.
მაჯის საათი ერთადერთი ნივთი არ არის, რაშიც გიორგი ამილახვარი დიდ თანხას იხდის. გასულ წლებში ოჯახმა ძვირადღირებული ფერწერული ტილოებიც იყიდა.
საქართველოს პარლამენტის განათლების კომიტეტის თავმჯდომარეს 2022 წელს საათში 9700 ევრო გადაუხდია, ეს დაახლოებით 30 000 ლარია. ძვირადღირებული საათი შეუძენია პარლამენტარის მეუღლესაც, მას 4900 ევრო ანუ 15000 ლარი გადაუხდია. საათების ბრენდი დეკლარაციაში მითითებული არ არის.
2022 წელს პარლამენტარის მეუღლემ კიდევ ერთი ძვირადღირებული ნივთი იყიდა, მან ოქროს ბეჭედში 3200 ევრო გადაიხადა.
2022 წელს შევსებული დეკლარაციის მიხედვით, 2021 წელს ამილახვარმა და მისმა მეუღლემ 50 000 ლარი დახარჯეს ახალი ტანსაცმლის შეძენაში, გასულ წელს კი – 40 000 ლარი.
საზღვარგარეთ მოგზაურობისთვის 2021 წელს 70 000 ლარი, 2022 წელს კი 55 000 ლარი დაუხარჯიათ.
შვილების სწავლის დასაფინანსებლად გასულ წელს პარლამენტარის [ახლა უკვე მინისტრის] მეუღლემ 25 000 ლარი და 5900 აშშ დოლარი გადაიხადა – ჯამში 42 000 ლარი. ანალოგიურად გადაუხდია 2021 წელსაც. მათი ორივე შვილი სკოლის ასაკისაა.
გიორგი ამილახვარი ფლობს 2019 წელს შეძენილ ავტომანქანას „Mercedes GLE 450“, ამ ავტომანქანაში მას 76000 ევრო გადაუხდია.
მინისტრის მეუღლეს გასულ წელს, დახმარების სახით, 20 ათასი ლარი გაუცია.
გიორგი ამილახვარი 39 წლისაა და ორი შვილი ჰყავს.
გიორგი ამილახვარი
