მთავარი,სიახლეები

თოვლი არის, მაგრამ გზა არა და შუქიც ქრება – რა ხდება კურორტ გოდერძიზე

22.02.2023 • 7047
თოვლი არის, მაგრამ გზა არა და შუქიც ქრება – რა ხდება კურორტ გოდერძიზე

მაღალმთიან აჭარაში ბოლო დღეებია გადაუღებლად თოვს.

„ბათუმელები“ დაინტერესდა, რა ხდება კურორტ გოდერძიზე, რამდენად ახერხებენ კურორტამდე მისვლას მომხმარებლები, ჰყავთ თუ არა სტუმრები საოჯახო სასტუმროს მფლობელებს მეზობელ სოფელში და ა.შ.?

ლერი გელაძეს საოჯახო სასტუმრო „ალავერდი“ აქვს გოდერძისთან ახლოს მდებარე სოფელ დანისპარაულში. მისი თქმით, სოფელში თოვლის სიმაღლე მინიმუმ 3 მეტრია.

„ალავერდში“ სხვადასხვა ქვეყნიდან გვყავდა დამსვენებლები და კარგი მუშაობაც გვქონდა, სანამ ამინდი გაუარესდებოდა.

ახლა არ გვყავს სტუმრები, ამინდის გამო არ მოდიან. ჩვენც ვეუბნებით და რეკომენდაციას ვუწევთ, რომ არ მოვიდნენ, რადგან გადაადგილება ძალიან რთულია დიდთოვლობის გამო.

გზებს წმენდენ, თუმცა ყოველ 1 საათში ისევ გასაწმენდია“ – გვითხრა ლერი გელაძემ.

საოჯახო სასტუმროს მეპატრონის თქმით, ხშირია შემთხვევები, როცა მანქანები გზაში იჭედებიან, მსგავსი შემთხვევა ჰქონდათ გუშინ ღამითაც.

„ჩვენი 5 სტუმარი დაახლოებით 3 საათი იყო მანქანაში. გზა რომ აღარ გაიხსნა, მანქანა მიატოვეს და სასტუმრომდე 3 კილომეტრი იარეს ფეხით.

გზაზე მეწყრები ჩამოდის, ზვავი და ამის გამოც იკეტება.

სტუმრებსაც 3-4 საათი უწევთ მანქანებში ლოდინი, თუ როდის მოვა ტრაქტორი და როდის გაწმენდს გზას.

გზა დატვირთულია, მუშაობით კი მხოლოდ 2 ტრაქტორი მუშაობს. მეტი ტრაქტორია საჭირო. ეს 2 ტრაქტორი გაუჩერებლად მოძრაობს, მაგრამ ისეთი ცუდი ამინდია, ვერ უმკლავდებიან გზის გაწმენდას“, – გვითხრა მან.

საუბრის ბოლოს ლერი გელაძე ელექტროენერგიის მიწოდების პრობლემასაც შეეხო.

„ახლაც არ გვაქვს შუქი. უშუქობა ძალიან გვაფერხებს ჯავშნების მიღებაში. უამრავი შემთხვევა გვქონია, რომ ჯავშნები უშუქობის გამო გაგვიუქმდა და ისეთი შემთხვევებიც, უშუქობის გამო რომ დატოვეს ჩვენი სასტუმრო.

სასტუმროში გათბობა ელექტროენერგიაზე გვაქვს, აქ ჯერ არ არის გაზი“, – ამბობს ლერი.

დანისპარაულის მკვიდრია ზაზა კოჩალიძეც. ის და მისი ოჯახი კურორტ გოდერძიზე თხილამურებს აქირავებენ. აქვთ სწრაფი კვების ობიექტიც.

„მომხმარებლების რაოდენობამ სერიოზულად იკლო, რადგან ცუდი გზებია, ვერ ამოდიან დამსვენებლები, პრობლემებია.

ტრაქტორები მუშაობენ, მაგრამ ცოტაა მათი რაოდენობა. ისედაც ძალიან ცუდი ტექნიკა აქვთ.

თუ არ გადაიდარა – არაფერი, თუ გადაიდარებს, მომხმარებლების რიცხვიც გაიზრდება“, – გვითხრა ზაზა კოჩალიძემ.

სასტუმრო „ამბასადორ გოდერძის“ გენერალურმა მენეჯერმა, ირაკლი მამფორიამ გვითხრა, რომ უკვე 5 დღეა, რაც გზის პრობლემა აფერხებთ სასტუმროს მომხმარებლებს კურორტამდე ასვლაში.

„დიდი ნალექი მოვიდა. გზა ბათუმიდან პარალიზებული იყო. გზის გაწმენდას ვერ ახერხებდნენ სრულად. გვქონდა გაუქმებული ჯავშნებიც“.

ირაკლი მამფორიამ გვითხრა, რომ კურორტზე თბილისიდან მიმავალი ტურისტები ახალციხის გავლით გზაში არ ფერხდებიან.

„ადიგენამდე მოდიან ავტომობილებით და შემდეგ თოვლმავალით გადმოყავთ ისინი კურორტამდე, შეუფერხებლად.

სასტუმროს მენეჯერის თქმით, იყო შემთხვევები, როცა ტურისტებს წასვლა უნდოდათ, მაგრამ უგზოობის გამო კიდევ რამდენიმე დღე მოუწიათ კურორტზე გაჩერება.

მისივე თქმით, მომხმარებლების რაოდენობის ზრდას გამოდარების შემდეგ ელოდებიან.

________________________________

ამავე თემაზე:

როგორ მიმდინარეობს სეზონი და რა ღირს დასვენება კურორტ გოდერძიზე

გადაბეჭდვის წესი


ასევე: