„მხოლოდ გზის პრობლემა გვაქვს ხულო-გოდერძის მონაკვეთზე, დანარჩენი ყველაფერი რიგზეა. გზა რომ იყოს, ხალხიც იქნება“, – გვითხრა ზაურ კოჩალიძემ. ის ხულოს სოფელ რიყეთის მკვიდრია და ოჯახის წევრებთან ერთად კურორტ გოდერძიზე მუშაობს. ზაურის ძირითადი საქმე საკუთარი ჯიხურიდან თხილამურებისა და სრიალისთვის აუცილებელი თუ დამხმარე საშუალებების გაქირავება და ინსტრუქტორობაა.
„ჩვენთან მთელი დღით თხილამურების, ბათინკების, ხელჯოხებისა და ჩაფხუტის დაქირავება 30 ლარი ღირს. მთლიანი კომპლექტი ეკიპირებასთან ერთად, ანუ ხელთათმანებიც და უნიფორმაც – 50 ლარი.
ინსტრუქტორის აყვანა 1 საათით 70 ლარი ღირს, თუ მთელი დღით სჭირდებათ ინსტრუქტორი, შეღავათებს ვაკეთებთ. ინსტრუქტორის მომსახურებაზე მოთხოვნა მაღალია. ბევრმა საერთოდ არ იცის თხილამურებზე დგომა, ბევრს ბაკურიანში აქვს ნასწავლი, აქაურ ტრასებთან შეჩვევა სჭირდება და ა.შ.
არის დღე, მხოლოდ 2 კაცზე ვაქირავებთ თხილამურებს, არის დღე, პირობითად, 60 მომხმარებელი გვყავს“, – გვეუბნება ზაური.
მისი თქმით, გასულ წელთან შედარებით კურორტზე ტურისტების რაოდენობა მომატებულია: „ძირითადად უცხოელები არიან. ყველა რუსულად ლაპარაკობს, მაგრამ რომელი ეროვნების არიან ვერ, ვარჩევ“.
ზაურ კოჩალიძის თქმით, იანვრის პირველ ნახევარში კურორტი ყოველთვის უფრო მეტად არის დატვირთული, ვიდრე შემდეგ, თუმცა იგი თებერვალშიც ელოდება გოდერძიზე მომხმარებლებს.
„თოვლიანობა შარშანდელთან შედარებით დაბალია, მაგრამ საკმაოდ კარგი თოვლია. [სათხილამურო] ტრასები 2-3 დღის წინ გაფუჭებული იყო, ადგილ-ადგილ ჩანდა მიწა, ითოვა და აღარ ჩანს. უთოვლობას წელს არ შევუფერხებივართ, თუმცა ასე თუ გაგრძელდა და არ ითოვა, დიდხანს ვერ გასტანს სეზონი“, – ამბობს ზაურ კოჩალიძე.
კურორტ გოდერძიზე სეზონი 2022 წლის ბოლოს, 31 დეკემბერს გაიხსნა.
კურორტი გოდერძი. ფოტო/ირაკლი მამფორია
სასტუმრო „ამბასადორ გოდერძის“ გენერალური მენეჯერის, ირაკლი მამფორიას თქმით, 15 იანვრის ჩათვლით მათი სასტუმრო 100-პროცენტიანი დატვირთვით მუშაობდა:
„შემდეგ, ასე ვთქვათ, ვარდნა იყო. 21 იანვრის ჩათვლით დაახლოებით – 40-41 პროცენტი [სტუმრების რაოდენობა], ახლა 15-20 პროცენტამდე შემცირდა“.
ირაკლი მამფორია გვეუბნება, რომ გასული წლის იანვართან შედარებით წელს, იანვრის თვეში, გაორმაგებულზე მეტი სტუმარი ჰყავდა სასტუმროს და თებერვლისთვისაც გაცილებით მეტი წინასწარი ჯავშანი აქვთ, ვიდრე წინა წელს. მისი თქმით, ნომრებს ახლაც აქტიურად ჯავშინიან.
„საახალწლო პერიოდში, 31 დეკემბრიდან 15 იანვრის ჩათვლით, 2-ადგილიანი ნომრის ფასი 200 დოლარი იყო ეკვივალენტი ლარში. შემდეგ უკვე დაბალი სეზონი მოდის, მარტის ბოლომდე 2-ადგილიანი ნომრის ფასი 160 დოლარიდან იწყება და 600 დოლარამდე იზრდება, გააჩნია ნომრის კატეგორიას, ხედს.
ნომრის ფასში შედის დილის საუზმე, ასევე დახურული საცურაო აუზი, 2 ტიპის საუნა და ბავშვთა გასართობი ცენტრი. ერთადგილიანი ნომრის ფასი 140 დოლარია ახლა, მაღალ სეზონზე 180 დოლარი იყო“, – გვითხრა ირაკლი მამფორიამ.
კურორტი გოდერძი. ფოტო/ირაკლი მამფორია
2022 წელს კურორტ გოდერძიზე სეზონი 5 აპრილს დაიხურა. სეზონის ხანგრძლივობა ადგილზე თოვლის სიმაღლეზეა დამოკიდებული. „ამბასადორ გოდერძის“ მენეჯერს სეზონის მინიმუმ მარტის ბოლომდე გაგრძელების იმედი აქვს.
„გზა, რა თქმა უნდა, [ხულო-გოდერძის მონაკვეთი] დასრულებული რომ იყოს, ბევრად მეტი სტუმარი ივლიდა კურორტზე – არა მარტო ჩვენს, არამედ სხვა სასტუმროებშიც. გზა აფერხებს მომხმარებლის აქამდე მოსვლას, თუმცა არიან მომხმარებლები, რომლებსაც, პირიქით, უგზოობა იზიდავს და მაგიტომაც დადიან. ასეთი სტუმრებიც გვყოლია“, – ამბობს ირაკლი მამფორია.
კურორტი გოდერძი. ფოტო/ირაკლი მამფორია
„წელს ქართველ და უცხოელ ვიზიტორთა რიცხვი კიდევ უფრო გაზრდილია. პარალელურად დაწყებულია ხულო-ზარზმის გზის მონაკვეთის მოწყობა, რაც კურორტის განვითარებას მნიშვნელოვნად შეუწყობს ხელს“, – მოგვწერეს ფინანსთა და ეკონომიკის სამინისტროს პრესსამსახურიდან.
_________________________________________________
მთავარ ფოტოზე: ტურისტები კურორტ გოდერძიზე. ირაკლი მამფორიას ფოტო
