ზღვის დაბინძურებისთვის პანამისა და პალაუს დროშის ქვეშ მცურავი გემები დააჯარიმეს

გარემოს ზედამხედველობის დეპარტამენტის ინფორმაციით, პანამისა და პალაუს დროშების ქვეშ მცურავი გემების კაპიტნები 65-65 ათასი ლარით დააჯარიმეს.

მათი განცხადებით, გამოვლინდა საქართველოს ტერიტორიული წყლების დაბინძურების ორი ფაქტი.

„პანამისა და პალაუს დროშების ქვეშ მცურავმა გემებმა ზღვა სამეურნეო წყლებით დააბინძურეს. გარემოსდაცვითი ზედამხედველობის დეპარტამენტისა და სასაზღვრო პოლიციის თანამშრომლებმა ადმინისტრაციული სამართალდარღვევის ოქმები 58 პრიმა 2 მუხლის მე-7 ნაწილით ერთობლივად შეადგინეს.

ფოთის საქალაქო სასამართლომ პანამისა და პალაუს დროშების ქვეშ მცურავი გემების კაპიტნებს 65-65 ათასი ლარის ოდენობით ჯარიმა  დააკისრა“ – ამბობს ზედამხედველობა.

უწყების განცხადებით, გემებს თავისუფალი ნაოსნობის უფლება დაკისრებული ჯარიმის გადახდის შემდეგ მიეცათ.