„არ ვიცი, რა ჩადიოდა ზღვაში, მაგრამ, ჩემი აზრით, ეს მშენებლობის პროცესში რეცხვის დროს გამოყენებული წყალია,“ – გვითხრა ბათუმში მცხოვრებმა ზურაბ ბოლქვაძე, რომელმაც გუშინ, 18 ივლისის დილით, ბათუმის პლაჟზე ზღვის დაბინძურების ფოტოები გადაიღო.
ზურაბ ბოლქვაძის თქმით, ის ბათუმის სანაპიროზე კომპანია „ალიანს ჯგუფის“ მშენებარე სასტუმროს „მერიოტის“ მიმდებარე ტერიტორიაზე იყო, სადაც ზღვას სანიაღვრე არხი უერთდება. გარემოსდაცვის ზედამხედველობის სამსახურში ადასტურებენ, რომ საქმე სამართალდარღვევასთან გვაქვს.
„ცურვა მინდოდა და უკან გამოვბრუნდი, აღარ შეისვლებოდა… ამ ადგილას ხშირად ვცურავ, პერიოდულად ცემენტის წყალს უშვებენ, მაგრამ ეს უფრო ღამის საათებში ხდება, ახლა დილით იყო, დაახლოებით 9 საათზე. დავრეკე 112-ზე და გარემოს დაცვა მოვიდა, მაგრამ ვერ მითხრეს, იყო თუ არა ეს დარღვევა,“ – ამბობს „ბათუმელებთან“ ზურაბ ბოლქვაძე.
„სამართალდარღვევაზე დაწყებულია ადმინისტრაციული საქმისწარმოება, შედგა შესაბამისი აქტი. წარმოების დასრულების შემდგომ, გატარდება კანონით გათვალისწინებული ღონისძიებები და შედგება შესაბამისი ადმინისტრაციული სამართალდარღვევის შესახებ ოქმი,“ – მოგვწერეს გარემოსდაცვითი ზედამხედველობის სამსახურის პრესცენტრიდან.
აქ ვერ გვითხრეს, სავარაუდოდ რამ დააბინძურა ზღვა, ან როგორია დაბინძურების მასშტაბი და საფრთხე.
