ბათუმის მერიის ინფორმაციით, დღეს მერიაში ე.წ. ,,იაფი სახლით“ მოსარგებლეთა კრიტერიუმების დამდგენი კომისიის მორიგი შეხვედრა გაიმართა. შეხვედრზე შვეიცარიის თანამშრომლობისა და განვითარების სააგენტოს მიერ გამოყოფილი კონსულტანტის დახმარებით შემუშავებული მეთოდოლოგიის პრეზენტაცია წარადგინეს. მეთოდოლოგია კრიტერიუმების საბაზისო დოკუმენტზე დაყრდნობით შემუშავდა.
სხდომას, რომელიც ჟურნალისტებისთვის დახურული იყო, არასამთავრობო სექტორის წარმომადგენლები ესწრებოდნენ.
„ბათუმელები“ კომისიის თავმჯდომარეს, თამაზ თურმანიძეს დაუკავშირდა, რომელმაც განმარტა, რომ სხდომას თავადაც არ დასწრებია: „მე არ ვიყავი სხდომაზე, ქალაქში არ ვარ და ჩამოსვლა ვერ მოვახერხე.“
თამაზ თურმანიძემ არ იცის, ვინ მიიღო აღნიშნული სხდომის ჟურნალისტებისთვის დახურვის გადაწყვეტილება.