თურქეთის მთავრობამ საშუალო შემოსავლის მქონე მოქალაქეებისთვის შეღავათიანი საცხოვრებლის პროგრამა შექმნა.
თურქული მედიის ცნობით, საშუალო შემოსავლის მქონე მოქალაქეებისთვის იპოთეკური სესხი 5 მილიონ თურქულ ლირამდე ($266,800) იქნება 15 წლამდე ვადით და წლიური საპროცენტო განაკვეთი დაიწყება 0,69 პროცენტიდან.
პროგრამის ფარგლებში თურქეთის ტერიტორია დაყოფილია სამ ზონად: პირველი მოიცავს სტამბულს, მეორე – ანკარას, იზმირს, ბურსას, ანტალიას, მერსინსა და მუღლუს, ხოლო მესამე – ქვეყნის ყველა სხვა პროვინციას.
საბანკო სტრუქტურების ფინანსური მხარდაჭერის მოცულობა სტამბულში 5 მილიონამდე თურქული ლირა იქნება, მეორეში ზონაში – 3 მილიონამდე, მესამეში – 2 მილიონამდე. პროგრამის პირობები ვრცელდება მხოლოდ ახალ საცხოვრებელ სახლებზე.
პროგრამაში მონაწილეობა შესაძლებელია მხოლოდ იმ პირობით, რომ პროგრამით მოსარგებლე თურქეთის მოქალაქეს ბოლო ერთი წლის განმავლობაში არ უნდა ჰქონოდა საცხოვრებელი და მას უკვე უნდა ჰქონდეს ცხოვრების მინიმუმ ერთწლიანი ცხოვრების გამოცდილება იმ პროვინციაში, სადაც სახლის შეძენა სურს.
ასევე, პროგრამის ფარგლებში შეძენილი საცხოვრებლის გაყიდვა მოქალაქეს არ შეეძლება მომდევნო ხუთი წლის განმავლობაში.
თურქული საინფორმაციო სააგენტო „ანადოლუს“ ცნობით, პირველ ეტაპზე 100 000 ოჯახის საცხოვრებლით უზრუნველყოფა იგეგმება.
2022 წლის ოქტომბრის მონაცემებით, თურქეთში საცხოვრებელ უძრავ ქონებაზე ფასები 188 პროცენტით გაიზარდა წინა წელთან შედარებით.
______________
ფოტო: „ანადოლუ“
