ნეტგაზეთი • RU

სომხური და აზერბაიჯანული ენის მასწავლებლები სრულ დანამატს მიიღებენ – მინისტრის ბრძანება

განათლების მინისტრის ბრძანების მიხედვით, საჯარო სკოლების მასწავლებელთა შრომის ანაზღაურებაში ცვლილება შევიდა, რომლის მიხედვით მასწავლებელს, რომელსაც ჩაბარებული აქვს საგნის გამოცდა ეთნიკური უმცირესობების ენებში:

სომხურ ან აზერბაიჯანულ ენაში და მინიჭებული აქვს უფროსის, მენტორის ან წამყვანის სტატუსი, სრული დანამატი მიეცემა იმ შემთხვევაში, თუ სკოლაში აღნიშნული ენისთვის გათვალისწინებული საგაკვეთილო საათების რაოდენობა, ნაკლებია სრული ოდენობის მისაღებად საჭირო საგაკვეთილო საათების რაოდენობაზე.

ბრძანების მიხედვით, ცვლილება გავრცელდბა 2022 წლის 15 სექტემბრიდან წარმოშობილ სამართლებრივ ურთიერთობებზე.

დღეს მოქმედი კანონმდებლობის მიხედვით, საჯარო სკოლებში მასწავლებლები სტატუსის დანამატს მხოლოდ იმ შემთხვევაში იღებენ სრულად, თუ მათ 15 და მეტი საგაკვეთილო საათი აქვთ.

ამ გადაწყვეტილებას სკოლის პედაგოგები არასამართლიანად მიიჩნევენ და ამბობენ, რომ სტატუსის დანამატი პედაგოგმა სრულად უნდა მიიღოს, იმის მიუხედავად, აქვს თუ არა 15 საათი.

„ბათუმელებმა“ ამ საკითხზე კითხვებით განათლების სამინისტროსაც მიმართა, თუმცა სამინისტრომ კითხვებს არ უპასუხა.

___________________

მსგავს თემაზე:

რაზე უნდა იყოს დამოკიდებული პედაგოგის ანაზღაურება – სტატუსსა თუ საათებზე?

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com