ხულოში 60 სმ-მდე თოვლია. დათოვლილი მთები და ხის სახლები იმდენად ლამაზი სანახავია, რომ ადგილობრივების აღფრთოვანებასაც კი იწვევს. მოქალაქეები ხულოს სოფლებიდან თავად გვიგზავნიან ფოტოებს. ზოგიერთი მათგანი არარეალურიც კი შეიძლება გეგონოთ.
ხულოს მუნიციპალიტეტი, მთა სარიჩაირი
ხულოს მუნიციპალიტეტის სოფელ ბაკიბაკოში მცხოვრებმა მერაბ დუმბაძემ ფოტოები გამოგვიგზავნა მთა სარიჩაირიდან. ის ახლაც მთაშია სრულიად მარტო. მისი სოფელი მთიდან 4 კილომეტრის დაშორებითაა. მერაბ დუმბაძე ხუთი წელია, რაც მთაზე ტურისტული ინფრასტრუქტურის შექმნას ცდილობს, მოაწყო კოტეჯები, ბუნებრივი ქვის ღობეები. ის დარწმუნებულია, რომ მთას დიდი ტურისტული პოტენციალი აქვს.
„ზაფხულის და ზამთრის კურორტად შეიძლება იქცეს ეს ადგილი, მთას ძალიან დიდი პოტენციალი აქვს. ტბა გავაკეთე, თევზი მყავს. საცურაო აუზი მოვაწყვე. ზაფხულისთვის საბავშვო ატრაქციონის მოწყობას ვგეგმავ. ამ ყველაფერს ჩემი ხარჯებით ვაკეთებ“.
მიუხედავად იმისა, რომ მთაზე ახლა მის გარდა არავინაა, მერაბ დუმბაძემ ნაძვის ხეც მორთო. იმედოვნებს, რომ წელს საახალწლოდ მეზობლები მთაზე ავლენ:
„არ ამოდიოდნენ, მაგრამ ახლა იციან, რომ მე აქ ვარ და ამოვლენ. აქ ძალიან დიდი სილამაზეა, ბუხარი მაქვს, 50 ადამიანზე ღამის გასათევი მაქვს, ზაფხულში გაქირავდა კიდეც, მაგრამ ზამთარში ჯერ არავინ ამოსულა. ელექტროენერგიაც არის. მე ზამთარშიც ვრჩები ხოლმე აქ, საშიში არაფერია“.
დაბა ხულოში დღეს საახალწლო კონცერტი იმართება – ამ კონცერტის გამართვის მომსახურება მერიამ პრემიერის განკარგულების შესაბამისად პირდაპირი წესით შეისყიდა. საახალწლო ღონისძიებების ორგანიზება ხულოს მუნიციპალიტეტმა ყველაზე დაბალ ფასად – 23 000 ლარად შეისყიდა. სატენდერო დოკუმენტების მიხედვით, ამ თანხით საახალწლო აქსესუარები იყიდეს. მერიაში გვითხრეს, რომ საახალწლო კონცერტზე ადგილობრივი შემსრულებლები გამოვლენ.
დათოვლილ მთაში განსაკუთრებით ლამაზია ღამით გადაღებული კადრები
მთა სარიჩაირი
ფოტოები სოფელ ძირკვაძეებიდანაც გამოგვიგზავნეს. ფოტო: მინდია აბულაძე
