მთავარი,სიახლეები

კრემლი მოლაპარაკებისთვის აყენებს პირობებს, რომლებიც დასავლეთის კაპიტულაციას უდრის – ISW

03.12.2022 • 1283
კრემლი მოლაპარაკებისთვის აყენებს პირობებს, რომლებიც დასავლეთის კაპიტულაციას უდრის – ISW

ომის კვლევის ამერიკული ინსტიტუტი (ISW) დარწმუნებულია, რომ რუსეთის პრეზიდენტს ომის დასასრულებლად უკრაინასთან მოლაპარაკებები არ აინტერესებს. პუტინის რიტორიკა მიუთითებს, რომ ის თავის მაქსიმალურ მიზნებზე უარს არ ამბობს და მოლაპარაკებების გარშემო შექმნილი ბუნდოვანებით დასავლეთის მოტყუებას ცდილობს.

ISW-ის უახლეს ანგარიშში ნათქვამია, რომ 2 დეკემბერს ხანგრძლივი სატელეფონო საუბარი შედგა რუსეთის პრეზიდენტსა და გერმანიის კანცლერს შორის. ამ საუბრისას პუტინი ამტკიცებდა, რომ დასავლეთის ფინანსური და სამხედრო დახმარების გამო უკრაინის ხელისუფლება ღიად უარყოფს მოსკოვთან ლაპარაკის შესაძლებლობას და ოლაფ შოლცს სთხოვა გადახედოს გერმანიის დამოკიდებულებას უკრაინაში ომისადმი.

თავის მხრივ, შოლცმა ხაზი გაუსვა, რომ ნებისმიერი დიპლომატიური გამოსავალი კონფლიქტიდან გულისხმობს რუსული ჯარების გაყვანას უკრაინის ტერიტორიიდან.

პუტინ-შოლცის საუბარს წინ უძღოდა ბაიდენის განცხადება, რომ მზადაა შეხვდეს პუტინს, თუკი ის ომის დასამთავრებლად გზებს ეძებს და თუ საკუთარ არმიას უკრაინიდან გაიყვანს.

ინსტიტუტის ანალიტიკოსების აზრით, პუტინი, ლავროვი და პესკოვი აკეთებდნენ განცხადებებს მოლაპარაკებებზე, რათა დასავლეთის ოფიციალური პირებისთვის შეექმნათ შთაბეჭდილება, რომ რუსეთს მოლაპარაკებებზე დათანხმება სჭირდება.

„კრემლი სავარაუდოდ ცდილობს, შექმნას ვითარება, რომელშიც დასავლეთის ოფიციალური პირები შესთავაზებენ რუსეთს კომპომისებს, სამაგიეროდ კი კრემლისგან სერიოზულ დათმობებს არ მოითხოვენ,“ – წერს ISW.

ექსპერტები აღნიშნავენ, რომ პუტინის, ლავროვისა თუ პესკოვის განცხადებები ხაზს უსვამს, როგორი შეიძლება იყოს მათთვის სასურველი კომპრომისი დასავლეთის მხრიდან: უკრაინისადმი ფინანსური და სამხედრო დახმარების შემცირება, უკრაინული ტერიტორიების უკანონო ანექსიის აღიარება და NATO-ს სამხედრო მოქმედებების შეზღუდვა ევროპაში.

ISW-ის აზრით, კრემლი მოლაპარაკებების გარშემო ბუნდოვანებას საგანგებოდ ქმნის, რათა უბიძგოს დასავლეთის ოფიციალურ პირებს მოლაპარაკებების პროცესი ცხადად განსაზღვრული პირობების გარეშე დაიწყონ.

ანალიტიკოსები დასძენენ, რომ კრემლი ნამდვილად მოიგებდა უკრაინასთან და დასავლეთთან დროებითი შეთანხმებით, რომელიც მას საბრძოლო მოქმედებებში ამოსუნთქვისა და მომავალი ბრძოლებისთვის ძალების აღდგენის საშუალებას მისცემდა.

„კრემლი განაგრძობს ისეთი პირობების წამოყენებას, რომლებიც დასავლეთის სრულ კაპიტულაციას უდრის. ეს ადასტურებს, რომ პუტინი კვლავაც ორიენტირებულია სამხედრო გამარჯვებაზე,“ – წერს ISW.

ISW-ის ანგარიშის სხვა მთავარი მიგნებები:

  • რუსეთის საგარეო საქმეთა მინისტრმა სერგეი ლავროვმა მოლაპარაკების პირობებად ზუსტად იგივე საკითხები წამოაყენა, რასაც რუსეთის საგარეო უწყება ჯერ კიდევ 24 თებერვლის შეჭრამდე ასახელებდა, კრემლის პრესსპიკერმა დმიტრი პესკოვმა კი დასძინა, რომ დასავლეთმა უკრაინული ტერიტორიების ანექსია უნდა აღიაროს.
  • უკრაინის ჰაერსაწინააღმდეგო თავდაცვის ეფექტიანი მუშაობის მიუხედავად, რუსეთის ძალები ჯერ კიდევ უქმნიან საფრთხეს უკრაინის ენერგოინფრასტრუქტურას;
  • უკრაინისთვის ჰაესრსაწინააღმდეგო თავდაცვის დამატებითი სისტემების გადაცემამ რუსეთის საინფორმაციო სივრცეში მღელვარება გამოიწვია და კითხვის ქვეშ დააყენა რუსეთის მომავალი სარაკეტო კამპანიის წარმატება;
  • რუსი ჩინოვნიკები აყენებენ პირობებს ზაპოროჟიეს ატომური ელექტროსადგურის დემილიტარიზაციის საკითხზე მოლაპარაკებებისთვის, თუმცა სავარაუდოდ, ისინი ამ პირობებს არ შეასრულებენ.  მხოლოდ სადგურის დემილიტარიზაცია, თუ რუსეთი ჯარებს არ გაიყვანს დასავლეთ ზაპოროჟიედან, ვერ გააუვნებლებს არსებულ საფრთხეს;
  • უკრაინის ძალებმა რამდენიმე ლოკალურ გარღვევას მიაღწიეს კრემინნას სამხრეთ-დასავლეთით და ჩრდილო-დასავლეთით;
  • რუსეთის ძალები განაგრძობდნენ მცირედ წინსვლას ბახმუტთან და შეტევებს ავდეევკა-დონეცკის რაიონში;
  • ცუდი ლოგისტიკა, მობილიზებულების პროტესტი და შიდა უკმაყოფილება კვლავაც ხელს უშლის კრემს, „ნაწილობრივი მობილიზაციისგან“ სასურველი შედეგები მიიღოს.

გადაბეჭდვის წესი


ასევე: