„თქვენ მხოლოდ ფრაგმენტულად გადმოეცით ჯო ბაიდენის განცხადება. სინამდვილეში, ის კიდევ რამდენიმე წინადადებას შეიცავდა. მან თქვა, რომ პირველი – პუტინი უნდა გავიდეს უკრაინიდან. ის მიიჩნევს, რომ ესაა მოლაპარაკებებისთვის მზაობის დემონსტრირებაა.
კრემლი ამისთვის მზად არ არის, სპეციალური სამხედრო ოპერაცია გრძელდება. შეერთებული შტატები კვლავაც არ აღიარებს რუსეთის ახალ ტერიტორიებს და ცხადია, ეს არსობრივად ართულებს დიალოგისთვის საფუძვლის პოვნას,“ – განაცხადა ვლადიმერ პუტინის პრესსპიკერმა, დმიტრი პესკოვმა, რომლის კომენტარსაც კრემლისტური გამოცემები ავრცელებენ.
მისი თქმით, პუტინი „ყოველთვის იყო, არის და დარჩება მზად მოლაპარაკებებისთვის რუსეთის ინტერესების უზრუნველსაყოფად“.
საფრანგეთის პრეზიდენტ, ემანუელ მაკრონთან სამსაათიანი შეხვედრის შემდეგ გუშინ საღამოს გამართულ პრესკონფერენციაზე, ჯო ბაიდენმა განაცხადა, რომ პუტინთან დაკავშირების არანაირი განზრახვა არ აქვს, თუმცა მზადაა ეს გააკეთოს, თუკი რუსეთის პრეზიდენტი ნამდვილად ეძებს გზებს უკრაინაში მის მიერვე გაჩაღებული ომის დასასრულებლად.
„ეს ომი შეიძლება დასრულდეს ერთადერთი რაციონალური გზით – თუ პუტინი უკრაინიდან ჯარებს გაიყვანს. რა თქმა უნდა, ის ამას არ გააკეთებს. ამისთვის მან უკვე დიდი ფასი გადაიხადა. მან მოაწყო უკრაინის მოსახლეობის დაუჯერებელი ხოცვა-ჟლეტა – ბომბავდა საბავშვო ბაღებს, საავადმყოფოებს, ბავშვთა თავშესაფრებს. ამაზრზენია, რასაც ის აკეთებს,“ – ბაიდენმა დასძინა, რომ პუტინთან შეხვედრას ის მხოლოდ ალიანსის მოკავშირეებთან კონსულტაციების შემდეგ დათანხმდება.
ორივე პრეზიდენტმა კიდევ ერთხელ დაადასტურა უპირობო და მტკიცე მხარდაჭერა უკრაინისადმი – ის, რომ მათთვის „წარმოუდგენელია, პუტინმა როდისმე დაამარცხოს უკრაინა“. ემანუელ მაკრონმა კი განაცხადა, რომ „არასოდეს სთხოვენ უკრაინელებს, დათანხმდნენ კომპრომისს, რომელიც მათთვის მიუღებელი იქნება“.
