დღეს, 25 ნოემბერს, ქალთა მიმართ ძალადობის წინააღმდეგ ბრძოლის დღე აღინიშნება.
გახშირებული ფემიციდი გააპროტესტეს დღეს ბათუმში მოქალაქეებმა, რომლებიც ჯერ ბათუმის საქალაქო სასამართლოსთან შეიკრიბნენ, შემდეგ კი მსვლელობით გადავიდნენ ევროპის მოედანზე.
ევროპის მოედანზე ახალგაზრდებმა მიიტანეს ტანსაცმელი, ფეხსაცმელი და სხვადასხვა ნივთი, რომლებიც ქალთან ასოცირდება. „ამ ნივთებს ყველას ჰყავდა პატრონი, თუმცა დღეს მათ აღარ შეუძლიათ გამოიყენონ, რადგან ისინი მოკლეს,“ – ამბობდნენ მოქალაქეები.
მოკლული ქალების სიმბოლოდ, საპროტესტო აქციაზე ქალის ტანსაცმელი და ფეხსაცმელები მიიტანეს
„საქართველო ეკონომიკურად ძალიან ღარიბი ქვეყანაა და ქალებს მეტი შრომა უწევთ ყოველდღიურად. კაცების დიდი ნაწილი კი დაუსაქმებელია, რაც კიდევ უფრო აძლიერებს მათ აგრესიას დასაქმებული ქალების მიმართ. ძალადობენ ქალებზე და თითქოს ამით ცდილობენ აჩვენონ სოციუმს, რომ მათი როლი არ შესუსტებულა საზოგადოებაში. ეს კომპლექსები გავლენას ახდენს კაცებზე,“ – თქვა ალინა გურგენიძემ.
ბათუმში ქალთა მიმართ ძალადობა და ფემიციდი გააპროტესტეს.
ფოტო: ლელა დუმბაძე/ბათუმელები
„ქალებს ნამდვილად არ უნდა კლავდნენ საქართველოში და არ უნდა ხდებოდეს მსგავსი რამ, რადგან ძალიან დიდი დანაშაულია. ვფიქრობ, ქალზე ძალადობა და ფემიციდი მკაცრად უნდა დაისაჯოს,“ – გვითხრა ანრი ვაშაყმაძემ, აქციის მონაწილემ.
„კაცებმა მაგიდაზე მუშტის დარტყმა და ბრძანებების გაცემა უნდა შეწყვიტონ. ვფიქრობ, ბევრი რამეა შესაცვლელი საზოგადოებაში, განსაკუთრებით ქალების ჩაგვრა და დამოკიდებულება, რომ კაცმა უნდა მართოს ქალი.
კაცს არ აქვს უფლება, ჩაახშოს ქალის თავისუფლება, რადგან ქალიც და კაციც თანასწორია და ამის საპირისპირო აზროვნება უნდა დაიგმოს,“ – მიაჩნია იოანე ჯინჭველაშვილს.
ანრი ვაშაყმაძე და იოანე ჯინჭველაშვილი ქალთა მიმართ ძალადობის საწინააღმდეგო აქციაზე ბათუმში.
ფოტო: ლელა დუმბაძე/ბათუმელები
სკოლის მოსწავლეები – მართა თოდუა და ქეთევან ფუტკარაძე მიიჩნევენ, რომ აუცილებელია განათლების დონე ამაღლდეს საზოგადოებაში, რომ ფემიციდი და ქალზე ძალადობა შეწყდეს.
„სხვა შემთხვევაში, რთული იქნება ამ ძალადობის შეჩერება,“ – მიაჩნია მართას. ქეთევანის აზრით, საზოგადოებამ უნდა გაიაზროს, რომ თუ ვიღაცის ოჯახში ძალადობა ხდება, ეს მათი პრობლემაც არის და ამაზე უნდა ჰქონდეთ რეაქცია.
„ბევრს უთქვამს ტრაგედიის შემდეგ, რომ იცოდნენ ძალადობის შესახებ, მაგრამ არაფერი მოიმოქმედეს. მოქმედებით ჩვენ შეგვიძლია გადავარჩინოთ ვიღაცის სიცოცხლე. სკოლაშიც ვმსჯელობთ ხოლმე ამ თემაზე, თუმცა არ არის საკმარისი მხოლოდ ახალგაზრდებთან საუბარი. ვფიქრობ, უფროს თაობასთანაც აუცილებელია ამ საკითხებზე საუბარი, რადგან მათი ცნობიერება და მენტალიტეტი უნდა შეიცვალოს“.
მართა თოდუა ფემიციდის საწინააღმდეგო აქციაზე
„სახელმწიფოს მეტ პასუხისმგებლობას დავაკისრებდი ფემიციდის ამბავში, რადგან მან უნდა განახორციელოს ისეთი ქმედებები, რომლებიც არ იქნება ორიენტირებული მხოლოდ ინდივიდების დასჯაზე, რადგან როგორც არ უნდა გაიზარდოს სასჯელი, თუ ამას არ მოჰყვა ისეთი ინიციატივები, რომლის მიზანია სექსიზმის, მიზოგინიის, გენდერული დისკრიმინაციის აღმოფხვრა, ისე ვერ მოხდება პრევენცია.
შემდეგი აუცილებელი ნაბიჯი უნდა იყოს ქალების გაძლიერება და სიღარიბის აღმოფხვრა. სხვაგვარად, მსხვერპლებს უჭირთ თავის დაცვა. ეს არ მოითხოვს დიდ დროს. სკოლაშიც დროულად უნდა დაინერგოს ცვლილებები და მინიმუმ ერთ წელიწადში შესაძლებელი იქნება ადამიანების ძალიან დიდ რაოდენობას ვასწავლოთ, რომ ქალი არ არის კაცზე ნაკლები, რომ ორივეს აქვს თანაბარი უფლებები და თანაბრად პატივსაცემი მოქალაქეები არიან,“ – ამბობს მარიამ ქაჯაია.
მარიამ ქაჯაია ფემიციდის საწინააღმდეგო აქციაზე ბათუმში.
„შემაკავებელი ორდერებს წერენ, მაგრამ ამას ხშირად არ აქვს შედეგი, რადგან ქალზე მოძალადე გარეთ არის და ხშირად ძალიან ცუდი შედეგი დგება. შესაბამისი ორგანოები უნდა მოქმედებდნენ დროულად, რომ მოძალადემ ვეღარ მოკლას ქალი,“ – ამბობს აქციის კიდევ ერთი მონაწილე.
ფემიციდის საწინააღმდეგო აქცია ბათუმში
ფოტო: ლელა დუმბაძე/ბათუმელები
