დღეს, 24 ნოემბერს, ხუთი წელი შესრულდა სასტუმრო „ლეოგრანდში“ მომხდარი ტრაგედიიდან. დღეს სასტუმროსთან, რომელსაც ტრაგედიის შემდეგ სახელი შეუცვალეს და „ველმონდი“ უწოდეს, დაღუპულების სურათები, ყვავილები და სანთლები მიიტანეს.
2017 წლის 24 ნოემბერს ბათუმში, სასტუმრო „ლეოგრანდში“ ხანძარი ღამით გაჩნდა. ხანძრის შედეგად დაიღუპა 11 ადამიანი, საქართველოს 10 და ირანის 1 მოქალაქე, ხოლო 21 ადამიანი საავადმყოფოში გადაიყვანეს.
ხანძარი სასტუმროში თავდაპირველად საქვაბე ოთახში გაჩნდა, სადაც თამბაქოს მოსაწევი ადგილი გამოყოფილი არ იყო. ასევე, არ არსებობდა ავტომატური სისტემა, რომელიც უზრუნველყოფდა საგანგაშო სისტემის ჩართვას და იმას, რომ კვამლი სავენტილაციო არხებში არ წასულიყო.
დაღუპულთა სურათები და სანთლები ბათუმში სასტუმროსთან, სადაც 5 წლის წინ ტრაგედია მოხდა. ფოტო: „ბათუმელები“
საქმეზე ორი მენეჯერი დააპატიმრეს. სასამართლოს გადაწყვეტილებით, ერთ მათგანს, თურქეთის მოქალაქეს, რომელიც სასტუმროს ტექნიკური მენეჯერი იყო, 5 წლით და 6 თვით თავისუფლების აღკვეთა მიუსაჯეს, საქართველოს მოქალაქეს კი, რომელიც სასტუმროს საწყობის ადმინისტრატორის/გამგეს პოზიციაზე მუშაობდა – ორი წლით თავისუფლების აღკვეთა შეუფარდეს.
ამავე თემაზე:
კახა მიქიაშვილი: ვხედავდით, როგორ ითხოვდა ხალხი ნომრებიდან შველას
