ნეტგაზეთი • RU

კომპანია ძეგლის ნიშნის მქონე შენობის დემონტაჟის ნებართვას ითხოვს – ავარიული სახლების პროგრამა

ბათუმში, 9 მარტის ქუჩაზე, #3,5 და 7 – ნომერში, შპს „სახლი ძველ ბათუმში 2022“ ახალი კორპუსის მშენებლობის დასაწყებად კვარტლის ათვისებას გეგმავს. ამავე კვარტალში მდებარეობს ძეგლის ნიშნის მქონე ისტორიული სახლი, რომელსაც ჯერ კიდევ შემორჩენილი აქვს ძველი მასკარონებიანი ფასადი.

კულტურული მემკვიდრეობის ეროვნული სააგენტოს ვებპორტალზე არსებული ინფორმაციით, 9 მარტის ქუჩაზე არსებული ორსართულიანი შენობა რენესანსულ-კლასიცისტურ სტილშია შესრულებული და მე-19 საუკუნის მე-3 პერიოდს ეკუთვნის – ის არქიტექტურული თვალსაზრისით ღირებულ ობიექტად მიიჩნევა.

ეს სახლი შპს „გეოგრაფიკმა“ 2015 წელს ძეგლის ნიშნის მქონე შენობების ნუსხაში შეიტანა. მერიამ კი ეს მონაცემები კულტურული მემკვიდრეობის ეროვნულ სააგენტოს წარუდგინა.

ავარიული სახლი 9 მარტის ქუჩაზე

2020 წლის მარტში „გეოგრაფიკის“ მიერ სტატუსის მისანიჭებლად წარდგენილ სახლებს ძეგლის სტატუსი მიანიჭეს. 9 მარტის ქუჩაზე, #3-ში არსებული სახლი კი კიდევ რამდენიმე სახლთან ერთად უსტატუსოდ დატოვეს. რატომ მოიქცნენ ასე, სააგენტოს ამის თაობაზე არ განმარტა. შენობა ავარიული სახლების ნუსხაშია.

9 მარტის ქუჩაზე მდებარე ავარიული სახლის სადარბაზო

კომპანია, „სახლი ძველ ბათუმში 2022“, ბათუმის მერიას აქ მცხოვრები მოსახლეობის „საფრთხისგან დახსნას“ ჰპირდება თუ K2  კოეფიციენტის გაზრდაზე თანხმობას და 15-სართულიანი სახლის მშენებლობის ნებართვას მიიღებს. საპროექტო მიწის ნაკვეთი 2030 კვ. მეტრია.

კომპანიამ მერიას მოთხოვნილ მიწის ნაკვეთზე მცხოვრები მესაკუთრეების თანხმობის ხელწერებიც წარუდგინა [ხელწერები ამხანაგობების კრების ოქმებშია დაფიქსირებული].

შპს „სახლი ძველ ბათუმში 2022“ – ს ასივე პროცენტს გიორგი გოგიჩაიშვილი ფლობს, კომპანია 2022 წლის აგვისტოშია დაფუძნებული.

ნეტგაზეთის მასალების სხვა გამოცემებში გადაბეჭდვის წესი
ავტორი