ბოლო 36 დღეში უკრაინის თავდაცვამ 223 ირანული კამიკაძე-დრონი „შაჰედ 136“ ჩამოაგდო – ამის შესახებ ფეისბუქზე უკრაინის საჰაერო ძალების შტაბი წერს.
„19 ოქტომბრის მონაცემებით, იმ პირველი შემთხვევის შემდეგ, როდესაც უკრაინის ტერიტორიაზე ირანული წარმოების დრონი „შაჰედ 136“ ჩამოვაგდეთ (2022 წლის 13 სექტემბერი, კუპიანსკი), საჰაერო ძალებისა და სხვა დანაყოფების მიერ განადგურებულია ამ ტიპის 223 უპილოტო საფრენი აპარატი“ – ნათქვამია შეტყობინებაში.
უკრაინის საჰაერო ძალები აღნიშნავენ, რომ ირანული დრონები რუსებს „გარან 2-ის“ სახელით აქვთ მარკირებული.
„ვმუშაობთ მათი გაუვნებლების უფრო ეფექტიან და ნაკლებხარჯიან მეთოდებზე, რადგან ახლა დრონის ჩამოგდებაზე გამანადგურებელი ავიაცია და საზენიტო კომპლექსებიც კი მუშაობს, თუმცა ვიდრე საფრთხე იარსებებს, გამოვიყენებთ ყველა საშუალებასა და ძალას, რაც ამ უპილოტო საფრენი აპარატების გასადაგურებლად გვაქვს,“ – უთხრა ჟურნალისტებს საჰაერო ძალების სპიკერმა იური იგნატმა.
იგნატის თქმით, უკრაინის საჰაერო თავდაცვა რუსეთის მიერ გაშვებული დრონების 85%-ს ანადგურებს.
ირანული წარმოების ლეტალურ აპარატებს რუსეთი უკრაინაში განსაკუთრებით აქტიურად ბოლო პერიოდში იყენებს. 10 ოქტომბერს დაწყებულ მასობრივ სარაკეტო და საავიაციო თავდასხმებში მთავარი როლი სწორედ „შაჰედებს“ ჰქონდათ. კიევის მერი ვიტალი კლიჩკო ამბობდა, რომ 17 ოქტომბრის დილით დედაქალაქის თავზე 30-მდე დრონი დაფრინავდა.
რუსეთისთვის ირანული დრონების გადაცემის შესახებ ცნობილი პირველად აგვისტოში გახდა, ოქტომბრის შუა რიცხვებში კი გაჩნდა ინფორმაცია, რომ მოსკოვმა თეირანს დამატებით კიდევ 2 ათასი დრონი შეუკვეთა.
რამდენიმე დღის წინ, დაზვერვის სამსახურებზე დაყრდნობით, დასავლურ მედიაში გამოქვეყნდა მასალები, რომელთა მიხედვითაც ირანი რუსეთისთვის დრონების გარდა ბალისტიკური რაკეტების გადაცემასაც აპირებს.
ოფიციალურმა თეირანმა რუსეთისთვის დრონების მიწოდება არაერთხელ უარყო, თუმცა როგორც უკრაინის საგარეო საქმეთა მინისტრმა დმიტრო კულებამ განაცხადა, უკრაინა მზადაა წარუდგინოს ევროკავშირის ქვეეყნებს მტკიცებულებები, რომლებიც თეირანისგან მოსკოვისთვის კამიკაძე-დრონების მიწოდებას დაადასტურებს. კულებამ უკვე მიმართა პრეზიდენტ ზელენსკის, რომ უკრაინამ ირანთან დიპლომატიური ურთიერთობები გაწყვიტოს.
