ბათუმში, გორგასლის 104/106-ში, შპს „კომფორტ ბილდინგი“ 11 სართულიანი კორპუსის მშენებლობას ამ ადგილზე არსებული ერთსართულიანი სახლისა და დამხმარე ნაგებობების დემონტაჟის ხარჯზე გეგმავს. მიწის ნაკვეთი ძეგლის დაცვის ზონაში მდებარეობს. როგორც მერიაში წარდგენილი დოკუმენტებიდან ირკვევა, პროექტი აჭარის კულტურული მემკვიდრეობის სააგენტოს ზონალურ საბჭოსთან შეთანხმებულია.
ბათუმი, გორგასლის #104/106
საჯარო რეესტრის მონაცემების მიხედვით, კომპანიამ მშენებლობის ნებართვის მოსაპოვებლად ორი საკადასტრო ერთეული გააერთიანა. მშენებლობა 580 კვ.მეტრზე იგეგმება. ეს იმას ნიშნავს, რომ პროექტს არ ექნება პროპორციული რაოდენობის პარკინგის ადგილი და ის ვერ დააკმაყოფილებს მოქმედი კოდექსის მოთხოვნებს, ასევე 41-ე დადგენილებას.
საქმე ისაა, რომ პროექტი მერიასთან ახალი სამშენებლო კოდექსის ამოქმედებამდე, ძველი რეგულაციებით არის შეთანხმებული. როგორც მერიაში ხსნიან, მერს არ შეუძლია წლების წინ უკვე შეთანხმებულ პროექტზე განმცხადებელს უარი უთხრას. ამ კონკრეტული პროექტის შემთხვევაშიც, ნებართვის შესახებ ბრძანებაში წერია, რომ პროექტი 2016 წლის 7 მარტს არის შეთანხმებული.
სამშენებლო კოდექსის ამოქმედებისა და რეგულაციების გამკაცრების შემდეგ, ბათუმში, როგორც მოსალოდნელი იყო, გამოჩნდა ბევრი პროექტი, რომელიც ძველი რეგულაციებითაა გაცემული. მერიაში განმარტავენ, რომ მსგავს შემთხვევაში მხოლოდ არქიტექტურული ნაწილი რომც იყოს შეთანხმებული, მფლობელს უარს ვეღარ ეტყვიან და ვერც ახალი სამშენებლო რეგულაციების გათვალისწინებას მოსთხოვენ: „წინააღმდეგ შემთხვევაში ის სასამართლოში გვიჩივლებს და მოგვიგებს კიდეცო“.
მერიაში ამბობენ, რომ ასეთი პრაქტიკა აქვთ.
პროექტის რენდერი
ნებართვის მიხედვით, გორგასლის ქუჩაზე დაგეგმილი პროექტის საცხოვრებელი ფართობი 2817 კვ.მეტრია. პარკინგისთვის კი მხოლოდ 181.8კვ/მეტრია გათვალისწინებული.
ნებართვის გაცემასთან დაკავშირებულ ბრძანებაში მოცემული ინფორმაციით ირკვევა ისიც, რომ კომპანია აჭარის მთავრობის არასათანადო-არასტანდარტული საცხოვრისის ათვისების პროგრამაში“ იღებს მონაწილეობას. მერი კომპანიას სთხოვს შესაბამისი კომისიის სხდომის ოქმი და საბანკო გარანტია წარუდგინოს.
კომპანია „კომფორტ ბილდინგი“ 2020 წელს კახა დევაძემ დააფუძნა.
რენდერი
