სხალთის ეპისკოპოსი სპირიდონ აბულაძე აცხადებს, რომ რუს ტურისტებს ისე ექცევიან საქართველოში, როგორც „ჰიტლერი ექცეოდა ებრაელებს“.
ეპისკოპოსმა ამ თემაზე 14 აგვისტოს ხიჭაურში იქადაგა ამბიონიდან.
„სოციალურ ქსელებში მოვისმინე, ტურისტებს აყენებენ შეურაცხყოფას. სლავებს, რუს ტურისტებს. ნუ ახლა, რა უნდა ვთქვათ, არაფერში არ წერია ეს. ჯერ ერთი, სტუმარ-მასპინძელი ხომ მაინც წაგიკითხავთ ვაჟა-ფშაველასი. მერე მეორე, პირდაპირ ჩანს, რომ ეს გარკვეული ძალების მიერ არის ინსპირირებული.
იქიდან მოუწოდა უკრაინის პრეზიდენტმა და მათმა ხელმძღვანელობამ, რომ რუს ტურისტებს ძალიან უხეშად მოეპყარით, გამოდევნეთ თქვენ-თქვენი ქვეყნიდანო.
რა შეიძლება ამაზე ითქვას. ასე აკეთებდა ჰიტლერი, ადოლფ ჰიტლერი. საწყალ ებრაელებს დევნიდა, სადაც ნახავდა, ხოცავდა ყველას. მაღაზიაში არ უშვებდა, რესტორანში არ უშვებდა, თავშეყრის ადგილებში არ უშვებდა. ეს იყო საშინელი დევნა ებრაელების. ახლა თქვენ აკეთებთ მაგას რუსების მიმართ.
აი, ესაა. რა ჰქვია მაგას? ეს ხომ საშინელი მკრეხელობაა კაცო,“ – იქადაგა სხალთის ეპისკოპოსმა.
სხალთის ეპისკოპოსი საქართველოს საპატრიარქოს სინოდის წევრია. რუსეთის უკრაინაში შეჭრის შემდეგ მან თქვა, რომ „ეკლესია ერთია“ და არ ესმის კრიტიკა, რაც რუსეთის პატრიარქის მიმართ გაჩნდა განსაკუთრებით მას შემდეგ, როცა მან უკრაინაში შეჭრამდე რუსული არმია დალოცა.
მან ასევე თქვა, რომ არის წინასწარმეტყველებები ამ ომზე და გაერთიანდება სამი ქვეყანა – რუსეთი, ბელარუსი და უკრაინა და ეყოლებათ ერთი მეფე.
ეპისკოპოს სპირიდონს ეკუთვნის ასევე ციტატა, რომ პუტინის განცხადება აფხაზეთსა და სამაჩაბლოზე შედეგია ჩვენი ცოდვების: „ამასწინათ იყო ტელევიზორში ჩვენი ჩრდილოელი მეზობლის, მართლმადიდებელი ქვეყნის სახელმწიფოს მეთაური და განაცხადა, რომ აფხაზეთი და სამაჩაბლო არ ყოფილა ქართული სახელმწიფოს შემადგენლობაში და საერთოდ, ქართველებს ჰქონდათ თუ არა დამოუკიდებლობა ესეც… რა თქმა უნდა, ეს არ არის სწორი. ღმერთმა აპატიოს მას, მაგრამ მე გეტყვით თქვენ – ეს მისი განცხადებები შედეგია ჩვენი ცოდვების“.
სხალთის მთავარეპისკოპოსი სპირიდონ აბულაძე ცნობილია თავისი პრორუსული განცხადებებითა და სიძულვილის ენის გამოყენებით. მთავარეპისკოპოსს უკავშირდება ნინოწმინდის პანსიონის სკანდალიც.
