Batumelebi | რას ფიქრობენ პროფესორები მეუფე სპირიდონის სიძულვილის ენაზე ომბუდსმენის მიმართ რას ფიქრობენ პროფესორები მეუფე სპირიდონის სიძულვილის ენაზე ომბუდსმენის მიმართ – Batumelebi
RU | GE  

რას ფიქრობენ პროფესორები მეუფე სპირიდონის სიძულვილის ენაზე ომბუდსმენის მიმართ

სხალთის ეპისკოპოსმა, სპირიდონმა 21 აპრილს ონლაინკონფერენცია გამართა, რომელსაც, მისი თქმით, 90 პროფესორ-მასწავლებელი ესწრებოდა. კონფერენციაში მონაწილე პროფესორ-მასწავლებლები ძირითადად იმ უნივერსიტეტში მუშაობენ, რომლის რექტორიც თავად სპირიდონია. თუმცა ესწრებოდნენ ისინიც, რომლებიც ბათუმის სახელმწიფო უნივერსიტეტში კითხულობენ ლექციებს.

საქმე იმაშია, რომ სახალხო დამცველმა, ნინო ლომჯარიამ 16 აპრილს სცადა შესულიყო ნინოწმინდის ბავშვთა სახლში, რომელიც ეპისკოპოს სპირიდონის პატრონაჟის ქვეშაა. მას ამის უფლება არ მისცეს, რაც კანონის დარღვევაა. კონფერენციაც სწორედ ამ საკითხს მიუძღვნა სხალთის ეპისკოპოსმა.

21 აპრილის კონფერენციის მონაწილე პროფესორ-მასწავლებლებს ეპისკოპოსმა სპირიდონმა სთხოვა, ესაუბრათ იმ დადებით მხარეებზე, რაც მათ ნინოწმინდის ბავშვთა სახლში ნახეს. ეპისკოპოსმა მათთანაც იქადაგა, რომ სახალხო დამცველი ნინო ლომჯარია ეკლესიის მტერი და გარყვნილი ადამიანია.

ეპისკოპოსმა სპირიდონმა კონფერენციის მონაწილე პროფესორ-მასწავლებლებს დაუზუსტა, თუ რატომ არ უშვებს ნინოწმინდის ბავშვთა სახლში სახალხო დამცველს – იმიტომ, რომ მას სურს „დააკანონოს გარყვნილება, ერთნაირსქესიანთა ქორწინება. ამიტომ მისი შეშვება იქ არაფრით არ შეიძლება. მასეთი ადამიანი სახლშიც კი არ უნდა შეუშვა“. ეს ციტატაც სასულიერო პირს ეკუთვნის. ონლაინკონფერენციას ესწრებოდნენ არასრულწლოვანი ბავშვებიც.

„ბათუმელები“ დაუკავშირდა იმ პროფესორ-მასწავლებლებს, რომლებიც კონფერენციაში მონაწილეობდნენ და ჰკითხა, იზიარებენ თუ არა ისინი ეპისკოპოსის პოზიციას სახალხო დამცველთან დაკავშირებით და ხედავენ თუ არა პრობლემას იმაში, რომ ეპისკოპოსი არ ემორჩილება ერთ-ერთ სახელმწიფო ინსტიტუციას, ანუ კანონს?

შუახევის ყოფილმა მერმა, ტარიელ ებრალიძე, რომელიც დღეს აჭარის განათლების ფონდში მუშაობს, კონფერენციაზე თქვა, რომ ნინოწმინდის ბავშვთა პანსიონის კრიტიკა „ეკლესიის წინააღმდეგ ტოტალური შეტევის ერთ-ერთი ფრაგმენტია. ლიბერასტების მიერ არის შექმნილი, რომ პატრიოტიზმს ებრძოლონ“.

თუმცა „ბათუმელებთან“ მან თქვა, რომ ეპისკოპოს სპირიდონის პოზიციას, როცა ის სახალხო დამცველს გარყვნილს და ბილწს უწოდებს, ამ ნაწილში არ იზიარებს.

„მე სატანას არ ვუწოდებ არავის. ჩემი იქ დასწრება (ონლაინშეხვედრაზე) არ ნიშნავს იმას, რომ ყველამ იქ რა აზრიც გამოთქვა, ყველაფერს ვეთანხმები. მე გამაჩნია ჩემი შეხედულება. ქვეყანაში უნდა არსებობდეს სახალხო დამცველი, უნდა არსებობდეს თავისუფალი მედია და უნდა არსებობდეს დამოუკიდებელი აზრი. თუმცა ვერავის დავეთანხმები იმაში, რომ ნინოწმინდის პანსიონში საშინელება ხდება,“ – ამბობს ებრალიძე.

მისი აზრით, სახალხო დამცველი პანსიონში მცხოვრებ ბავშვებს აღმზრდელების თანდასწრებით უნდა შეხვდეს და არა მარტო. ასევე, ის ამბობს, რომ ამ ბავშვების მდგომარეობის შესწავლა თუ ვინმეს სურს, ღონისძიებებზე უნდა ჩავიდეს და დაესწროს.

ეპისკოპოსი სპირიდონის მიერ გამართულ ონლაინკონფერენციას კიდევ ერთი ყოფილი მერი, ბესიკ ბაუჩაძე ესწრებოდა. ის ახლა ხიჭაურის უნივერსიტეტშიც მუშაობს და ბსუ-შიც კითხულობს ლექციებს.

კონფერენციაზე მან თქვა: „ჩვენ მხარს გიჭერთ მეუფეო“. თუმცა „ბათუმელებთან“ ამბობს, რომ სპირიდონის პოზიციას სახალხო დამცველთან მიმართებაში არ იზიარებს.

„მე, რა თქმა უნდა, ვემიჯნები ასეთ გამონათქვამებს. არ ვიზიარებ მაგ პოზიციას (რომ სახალხო დამცველი ბილწი და სატანაა), ასეთი დამოკიდებულება არ შეიძლება. ყველა სახელმწიფო ინსტიტუტს პატივს ვცემ, ყველა ინსტიტუტმა უნდა იმოქმედოს, ეს არის დემოკრატია, თუმცა ინსტიტუტებს შორის ურთიერთთანამშრომლობა ჩემი გასარკვევი არ არის,“ – ამბობს ბაუჩაძე.

ხულოს ყოფილი მერის თქმით, სახალხო დამცველს კონსტიტუციურად აქვს უფლება, შევიდეს ასეთ დაწესებულებებში.

ონლაინკონფერენციას ესწრებოდა ბათუმის ხელოვნების უნივერსიტეტის რექტორი მაია ჭიჭილეიშვილიც. „ბათუმელები“ მასაც დავუკავშირდით და ჰკითხა, რამდენად იზიარებს ეპისკოპოსის შეფასებებს სახალხო დამცველთან დაკავშირებით.

მაია ჭიჭილეიშვილი ამბობს, რომ მსგავსი სიტყვები სპირიდონისგან არ მოუსმენია.

„არ ვიცი, არ მომისმენია, სიმართლე რომ გითხრათ, მე შევედი გვიან კონფერენციაზე და ვერაფერს ვერ გეტყვით“.

რაც შეეხება ეპისკოპოს სპირიდონის მხრიდან არაერთგზის გამოყენებულ სიძულვილის ენას ნინო ლომჯარიასთან მიმართებაში, ჭიჭილეიშვილი ამბობს – „პირველად მესმის“.

„მე მსგავსი პათოსი არ შემიმჩნევია (სპირიდონისთვის) იმიტომ, რომ ბოლო ნაწილში შევუერთდი კონფერენციას და მანამდე თუ იყო, ვერ გეტყვით“.

თუმცა დასძენს, რომ ნინოწმინდის ბავშვთა სახლით ბევრია აღფრთოვანებული.

„ბავშვთა სახლში სისტემატურად დადიოდნენ ჩვენი პედაგოგები და აღფრთოვანებულები იყვნენ ბავშვების განათლებითო“.

ამის შემდეგ ვკითხეთ, მისი აზრით, უნდა ეძლეოდეს თუ არა სახალხო დამცველს პანსიონში ბავშვებთან შეხვედრის უფლება ან საერთოდ უნდა არსებობდეს თუ არა მსგავსი ტიპის დაწესებულება ქვეყანაში? – მაია ჭიჭილეიშვილი ამბობს, რომ სახალხო დამცველმა „მისი უფლებამოსილების ფარგლებში ყველაფერი უნდა გაარკვიოს“.

ბავშვთა სახლების არსებობაზე კი ჩამოყალიბებული პოზიცია არ აქვს.

„ბათუმელები“ შეეცადა დაკავშირებოდა როინ მალაყმაძეს და მზია შავაძეს, რომლებიც ასევე ესწრებოდნენ ამ კონფერენციას და ხიჭაურის უნივერსიტეტის მეცნიერ-თანამშრომლები არიან. მათ ვერ დავუკავშირდით.

კონფერენციაზე როინ მალაყმაძემ თქვა, რომ ნინოწმინდის ბავშვთა პანსიონი „ერთადერთი მარგალიტია“ სამცხე-ჯავახეთში და „ასეთი დაწესებულების წინააღმდეგ წასვლა, ქვეყნის წინააღმდეგ წასვლას ნიშნავს“.

მზია შავაძეს კი მიაჩნია, რომ „საქართველოზე ასე შემართებით რომ ამბობენ ლექსს (პანსიონის ბავშვები), ალბათ ეს არ მოსწონთ“.

კონფერენციას ხიჭაურის სასულიერო სკოლის პედაგოგი ირა აბულაძეც ესწრებოდა, რომელმაც თქვა, რომ ვინც ეპისკოპოს სპირიდონს აკრიტიკებს და ბავშვთა სახლის შესწავლას ითხოვს, „ეშმაკის მსახურები არიან. ესენი ქართველები არ არიან, არც ქართული სისხლი აქვთ და არც ქართული ჯიშის არიან“.

სახალხო დამცველი წლებია აღნიშნავს, რომ ნინოწმინდის წმინდა ნინოს ბავშვთა სახლში განხორციელებულმა მონიტორინგებმა გამოკვეთა ბავშვთა მიმართ ძალადობის მწვავე ფაქტები და ბავშვების დასჯის შემთხვევები.

„პანსიონში მცხოვრები არასრულწლოვნები ფაქტობრივად იზოლირებული არიან სოციუმიდან და პრობლემურია მათი ინდივიდუალური საჭიროებების დაკმაყოფილების საკითხი. ამჟამად პანსიონში 57 არასრულწლოვანი ირიცხება, მათგან ყველაზე პატარა 5 წლისაა“.

დაწესებულებაში მონიტორინგის შესაძლებლობა არც სახელმწიფო ზრუნვის სააგენტოს სოციალურ მუშაკს ეძლევა. ეს უწყება 2020 წლის ივნისის შემდეგ პანსიონში არ შესულა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com