უკრაინის პრეზიდენტის მრჩეველი, მიხაილო პოდოლიაკი უკრაინაში გადამწვარი მინდვრების ვიდეოს აქვეყნებს და წერს, რომ რუსეთის უდიდესი სურვილია მთელი ევროპა სწორედ ასეთ მდგომარეობაში იხილოს:
„დამწვარი მინდვრები უკრაინაში. ეს არის „რუსული სამყაროს“ სახე: ნგრევა, სიკვდილი და განადგურება. რუსეთის ყველაზე დიდი სურვილი ევროპის ასეთ მდგომარეობაში ხილვაა. ჩვენს სამყაროსა და ჯოჯოხეთს შორის გამყოფი ხაზი ახლა უკრაინაა და ჩვენ ბოროტებას გავაბრუნებთ განსაწმენდელში. მხოლოდ ეგზორციზმის იარაღია საჭირო“.
Burnt fields in Ukraine. This is the face of the “Russian world”: destruction, death and devastation. 🇷🇺’s greatest desire is to see Europe that way. Dividing line between our world and hell is now in 🇺🇦 and we will send the evil back to purgatory. Only exorcism weapons required. pic.twitter.com/QHbQjcXIkY
— Михайло Подоляк (@Podolyak_M) August 12, 2022
ყირიმის აეროდრომზე მომხდარი აფეთქების კომენტირებისას, უკრაინის პრეზიდენტის მრჩეველი, მიხაილო პოდოლიაკი ამბობს, რომ ასეთი „პატარა აფეთქებები“, როგორც მას თავად რუსებმა უწოდეს, ოკუპანტების საწყობებში კიდევ გაგრძელდება.
„ვფიქრობ, მომდევნო 2-3 თვის განმავლობაში ასეთი „პატარა აფეთქებები“ რუსეთის საბრძოლო მასალების თითქმის ყველა საწყობში იქნება,“ – ამბობს პოდოლიაკი და დასძენს, რომ რუსების მხრიდან მსგავსი განცხადებები გახშირდება.
მისი თქმით, რუსეთი მხოლოდ ახლა იწყებს იმის გაცნობიერებას, თუ რა ტიპის ომი მიიღო უკრაინაში: „რუსები ხომ 3-7 დღით შემოვიდნენ. ჯერ კიდევ ვერ ვიგებ, გავიდა კი ის სამი დღე, კიევი რომ უნდა აეღოთ. იქნებ ჩვენ უბრალოდ არასწორად გვესმის ეს დღეები. იქნებ მათთვის ერთი დღე – ნახევარი წელია“.
პრეზიდენტის მრჩევლის თქმით, რუსეთი საბჭოთა სტანდარტებით იბრძვის – დამრტყმელ დაჯგუფებებს კონკრეტული მიმართულებისთვის ქმნის და კონკრეტული ტერიტორიების დაპყრობას ცდილობს.
„მათთვის ბრძოლა უფრო იოლი იყო, როდესაც ფრონტის წინა ხაზის მომარაგება შეეძლოთ, მაგრამ ახლა, იძულებული არიან, რაც შეიძლება ღრმად ზურგში გადაიტანონ ეს ყველაფერი. ჩვენ რუსეთის არმიის ლოჯისტიკას ვანგრევთ,“ – ამბობს პოდოლიაკი.
მისი შეფასებით, ლოჯისტიკური პრობლემები მომავალში კიდევ უფრო გაღრმავდება და რუსეთის დანაკარგიც გაიზრდება: „ეს ომის სრულიად განსხვავებულია. ისეთი, რომლისთვისაც ისინი მზად არ იყვნენ“.
ყირიმში, ნოვოფედოროვკასთან მდებარე „საკის“ სამხედრო ავიაბაზაზე რამდენიმე აფეთქება 9 აგვისტოს მოხდა. რუსეთის თავდაცვამ განაცხადა, რომ მომხდარი უკრაინულ მხარეს არ უკავშირდება და აეროდრომზე საავიაციო საბრძოლო მასალები აფეთქდა.
რუსეთის ზარალი სამმა უცხოურმა წყარომ სატელიტურ ფოტოებზე დაყრდნობით შეაფასა. ანალიტიკოსებმა აღნიშნეს, რომ 9-დან 14-მდე თვითმფრინავი განადგურდა ან დაზიანდა.
8 საბრძოლო თვითმფრინავის განადგურება დაადასტურა დიდი ბრიტანეთის დაზვერვამაც.