ყირიმში, ნოვოფედოროვკას აეროდრომზე მომხდარი აფეთქებების შედეგად განადგურებული რუსული ტექნიკის რაოდენობაზე ინფორმაციას სამი უცხოური წყარო ავრცელებს.
პორტალი Oryx-ი, რომელიც ღია მონაცემებსა და სადაზვერვო ცნობებს სწავლობს, წერს, რომ განადგურდა სულ მცირე 4 თვითმფრინავი სუ 30 CM და 6 მოიერიშე-მზვერავი სუ 24 M/MP (5 განადგურდა, ერთი დაზიანდა.)
List Of Aircraft Losses During The 2022 Russian Invasion Of #Ukraine 🇷🇺🇺🇦
Russian losses at Saky airbase updated with:
– 4 Su-30SM multirole aircraft (destroyed)
– 6 Su-24M/MR strike/tactical reconnaissance aircraft (5, destroyed, 1x damaged)https://t.co/5JxYI4fmCm— Oryx (@oryxspioenkop) August 10, 2022
OSINT (Open-source intelligence) ანალიტიკოსი, ოლივერ ალექსანდერი ტვიტერზე აქვეყნებს აეროდრომის სატელიტურ ფოტოს, რომელზეც რუსული სამხედრო თვითმფრინავების რაოდენობა და მათი განლაგების ადგილებია მონიშნული. მისი თქმით, 9-დან 14-მდე თვითმფრინავია განადგურებული.
Finally we have imagery of Saki Airbase. Serious losses for Russian aviation. At least 3 Su-30s and 6 Su-24s have been destroyed. Imagery isn’t good enough to confirm, but possibly 2 additional Su-24s and 3 additional Su-30s destroyed.
Between 9-14 aircraft destroyed. https://t.co/MDK3JVVoc3 pic.twitter.com/OLgkgqjSkr
— Oliver Alexander (@OAlexanderDK) August 10, 2022
სატელიტურ ფოტოებს აქვეყნებს ტვიტერზე საგამოძიებო პროექტ Bellingcat-ის დამფუძნებელი ელიოტ ჰიგინსიც. ის შედარებისთვის აეროდრომის 9 და 10 აგვისტოს ფოტოებს ავრცელებს. 10 აგვისტოს ფოტოზე კარგად ჩანს აფეთქების კვალი, განადგურებული ტექნიკა და დანგრეული შენობები.
„არ მახსენდება, რომ რუსეთს როდისმე ამდენი საავიაციო ტექნიკა დაეკარგა ერთ დღეში. ისინი ძალიან შეშფოთებული უნდა იყვნენ უკრაინის შესაძლებლობით, განახორციელოს ასეთი დარტყმა სადმე, განსაკუთრებით კი ყირიმის ხიდზე“, – წერს ჟურნალისტი.
9 აგვისტოს ყირიმში, ნოვოფედოროვკასთან მდებარე „საკის“ სამხედრო ავიაბაზაზე რამდენიმე აფეთქება მოხდა. რუსეთის თავდაცვამ განაცხადა, რომ მომხდარი უკრაინულ მხარეს არ უკავშირდება და აეროდრომზე საავიაციო საბრძოლო მასალები აფეთქდა. უწყების ცნობით, არ დაზიანებული სამხედრო ტექნიკა და არ არის მსხვერპლი.
უკრაინის თავდაცვის უწყებამ 9 აგვისტოს ფეისბუქზე გამოქვეყნებულ პოსტში დაწერა, რომ ხანძრის მიზეზების შესახებ ინფორმაცია არ აქვს და რუსებს „სახანძრო უსაფრთხოების წესებისა და არასათანადო ადგილებში მოწევის აკრძალვის შესახებ“ შეახსენა.
„ერთდროულად ორ სხვადასხვა ობიექტზე აფეთქება, სავარაუდოდ, გამორიცხავს რუსეთის ოფიციალურ ვერსიას, შემთხვევითი ხანძრის შესახებ, მაგრამ არ გამორიცხავს არც დივერსიას და არც შორ დისტანციაზე სარაკეტო შეტევას“, – აღნიშნავენ აშშ-ის ომის კვლევის ინსტიტუტის ანალიტიკოსები.
ორგანიზაციის განმარტებით, რუსეთს იმიტომ არ შეუძლია დაადანაშაულოს უკრაინა ნოვოფედოროვკას ავიაბაზაზე თავდასხმაში, რომ ეს იქნება რუსეთის საჰაერო თავდაცვის სისტემის არაეფექტურობის კიდევ ერთი დადასტურება, როგორც ეს უკვე მოხდა კრეისერ „მოსკვას“ შემთხვევაში.
___
მთავარი ფოტო: ნოვოფედოროვკას აეროდრომი, „საკის“ სამხედრო ავიაბაზაზე ყირიმში – სატელიტური ფოტო, რომელსაც ოლივერ ალექსანდერი ტვიტერზე აქვეყნებს