დონეცკის იზოლატორში „აზოვსტალის“ მებრძოლის დაღუპვის შესახებ ინფორმაციას კრემლის გამოცემა ТАСС-ი ავრცელებს. რუსული სააგენტოს ცნობით, სიკვდილის მიზეზი „ქრონიკული დაავადებები და ნარკოტიკები გახდა“.
„დივერსიული დაჯგუფების „მედვედი SS-ის“ ერთ-ერთი წევრი ტყვეობამდე, ჯერ კიდევ „აზოვსტალში“ მიეძალა ნარკოტიკებს, რამაც ჯერ ქრონიკული დაავადებების პროვოცირება, შემდეგ კი სიკვდილი გამოიწვია“, – წერს ТАСС-ი და დასძენს, რომ დაჯგუფებას ასობით ადამიანი ჰყავს მოკლული.
გავრცელებულ ინფორმაციაში ნათქვამია, რომ დაღუპული მებრძოლის საქმე დაიხურება, თუმცა მის ჩვენებებს სასამართლო გაითვალისწინებს.
დაღუპული „აზოვსტალელის“ ვინაობას რუსული მედია არ ასახელებს. უკრაინული მედია კი შენიშნავს, რომ რუსებმა მოტოქვეითი ბატალიონის „მედვედის“ სახელს ინფორმაციაში SS დაუმატეს, რათა მკითხველმა ის მეორე მსოფლიო ომის გერმანიას დაუკავშიროს და შეექმნას შთაბეჭდილება, რომ ბატალიონი ნაცისტურია.
29 ივლისს დონეცკში, ელენოვკაში მომხდარი თავდასხმის შედეგად 53 უკრაინელი სამხედრო ტყვე დაიღუპა და 130 დაიჭრა, მათ შორის, პოლკ „აზოვის“ მებრძოლები. ეს თავდასხმა უკრაინამ ტერაქტად შეაფასა და საერთაშორისო საზოგადოებას მისი გამოძიება სთხოვა.
15 ივლისს ცნობილი გახდა, რომ დონეცკში დაიღუპა ბრიტანეთის მოქალაქე, ერთ-ერთი არასამთავრობო ორგანიზაციის მოხალისე, 45 წლის პოლ ური, რომელიც რუსებმა 25 აპრილს ზაპოროჟიესთან, საკონტროლო გამშვებ პუნქტზე, ამავე ორგანიზაციის კიდევ ერთ მოხალისესთან, დილან ჰილისთან ერთად დააკავეს.
მისი სიკვდილის მიზეზად სეპარატისტული რესპუბლიკის ხელისუფლებამ „ქრონიკული დაავადებები და სტრესი“ დაასახელა.
