პარლამენტის ყოფილი წევრი „ქართული ოცნებიდან“ ნუკრი ქანთარია ბათუმის დრამატული თეატრის სამხატვრო ხელმძღვანელად კონკურსის გარეშე დანიშნეს.
როგორც აჭარის განათლებისა და კულტურის სამინისტროში „ბათუმელებს“ უთხრეს, ქანთარია ამ თანამდებობაზე აჭარის განათლების მინისტრის გადაწყვეტილებით დაინიშნა და ის მოვალეობის შესრულებას პირველი აგვისტოდან შეუდგება.
კითხვაზე, თუ რატომ არ გამოცხადდა კონკურსი, სამინისტროში გვითხრეს, რომ მინისტრს სამხატვრო ხელმძღვანელის დანიშვნის უფლება აქვს.
სამინისტროში ზუსტად ვერც იმ კითხვაზე გვიპასუხეს, იყო თუ არა ეს საკითხი შეთანხმებული დრამატული თეატრის კოლექტივთან.
ნუკრი ქანთარია ორი მოწვევის პარლამენტარი იყო „ქართული ოცნებიდან“. პროფესიით ის დრამის რეჟისორია.
