მთავარი,სიახლეები

19 ორგანიზაცია მარნეულის მერიიდან ოთარაშვილის, ინაძისა და ზარქუას გათავისუფლებას ითხოვს

11.07.2022 • 1044
19 ორგანიზაცია მარნეულის მერიიდან ოთარაშვილის, ინაძისა და ზარქუას გათავისუფლებას ითხოვს

19 არასამთავრობო ორგანიზაცია მარნეულის მერიას „ქალთა ოთახის“ ხელმძღვანელის, რიმა ოთარაშვილის, მარნეულის მუნიციპალიტეტის ტერიტორიაზე არსებული ბაგა – ბაღების გაერთიანების დირექტორის მოადგილის, სოსო ინაძისა და კიდევ ერთი პირის, ირმა ზარქუას თანამდებობიდან გათავისუფლებას ითხოვს [სოციალური სამართლიანობის ცენტრის განმარტებით, ირმა ზარქუა სავარაუდოდ, მერიის ზედამხედველობის სამსახურში მუშაობს].

ორგანიზაციების ინფორმაციით, ამ პირებმა 2 ივლისს სიტყვიერად შეურაცხყვეს სამოქალაქო აქტივისტები, მათ შორის სამირა ბაირამოვა მარნეულის ბაზარში „შინ ევროპისკენ“ საინფორმაციო კამპანიის დროს.

„ასევე ჰქონდათ ფიზიკური ანგარიშსწორების მცდელობაც“, – ნათქვამია „სოციალური სამართლიანობის ცენტრის“ მიერ გავრცელებულ ინფორმაციაში.

ორგანიზაციების შეფასებით, „ქალთა ოთახის“ პირდაპირი მოვალეობაა ხელი შეუწყოს ქალების როლის და ფუნქციის გაზრდას თვითმმართველობის საქმიანობაში და უზრუნველყოს მუნიციპალიტეტში მცხოვრები ქალების სოციალურ-ეკონომიკური და პოლიტიკური უთანასწორობის აღმოფხვრა.

„რიმა ოთარაშვილთან ერთად, მარნეულის მუნიციპალიტეტის ზედამხედველობის სამსახურის თანამშრომელი – ირმა ზარქუა და ასევე, მარნეულის ალტ-ინფოს ოფისის მდივანი, აქციის დროს მომმართავდნენ შეურაცხმყოფელი სიტყვებით და ცდილობდნენ ხელი შეეშალათ აქციის მშვიდობიანად ჩატარებაში.

შესაბამისად, კამპანიის მონაწილეები იძულებულნი გახდნენ, ტერიტორია დაეტოვებინათ, რათა არ გამხდარიყვნენ პროვოკაციის მსხვერპლნი. ამ ჩარევის გამო აღნიშნულ ადგილზე ვერ ჩატარდა სხვა დაგეგმილი ღონისძიება, რაც აზრისა და ინფორმაციის გავრცელების უფლების (საქართველოს კონსტიტუცია, მე-17 მუხლი) შეზღუდვას წარმოადგენს“, – წერია ორგანიზაციების მიერ გავრცელებულ განცხადებაში.

პეტიციის ავტორთა თქმით, პოლიცია ცდილობდა დაპირისპირების განმუხტვას, თუმცა არ ახდენდა სათანადო რეაგირებას თვითმმართველობის თანამშრომლების მხრიდან უკანონო მოქმედებების აღსაკვეთად.

„თვითმმართველობის ცალკეულმა პირებმა შეწყვიტონ შეურაცხყოფაზე დაფუძნებული გამოხატვა და დაიწყონ კონსტრუქციული თანამშრომლობა მედიასა და სამოქალაქო სექტორთან“, – ამბობს არასამთავრობო ორგანიზაცია და აღნიშნული პირების თანამდებობიდან გათავისუფლების თაობაზე პეტიციას ავრცელებს:

„საჯარო დაწესებულებაში ინტერესთა შეუთავსებლობისა და კორუფციის შესახებ“ საქართველოს კანონის მე-13 მუხლის თანახმად, საჯარო მოსამსახურემ თავისი საქმიანობა უნდა განახორციელოს საქართველოს კანონმდებლობის საფუძველზე, საჯარო მოსამსახურის ქცევის ზოგადი წესების შესაბამისად.

საჯარო მოსამსახურემ თავიდან უნდა აიცილოს ნებისმიერი მოქმედება, რომელიც ზიანს მიაყენებს პირადად მის რეპუტაციას, შესაბამისი საჯარო დაწესებულების ან სახელმწიფო სამსახურის/საჯარო სამსახურის რეპუტაციას.

საქართველოს მთავრობის 2017 წლის 20 აპრილის №200 დადგენილების „საჯარო დაწესებულებაში ეთიკისა და ქცევის ზოგადი წესების განსაზღვრის შესახებ“ მე-6 მუხლის თანახმად, საჯარო მოსამსახურე თავს იკავებს სამსახურებრივი მოვალეობის შესრულებისას კომუნიკაციის საშუალებებით, მათ შორის, სოციალური ქსელების გამოყენებით, ისეთი ქმედებებისაგან, განცხადებებისაგან ან/და სოციალური აქტივობისაგან, რომელიც შესაძლებელია, აღქმულ იქნეს კონკრეტული პოლიტიკური პარტიის ინტერესების გატარებად.

ამავე დადგენილების მე-11 მუხლის მიხედვით, საჯარო მოსამსახურე თავს იკავებს საჯაროდ სიძულვილის ენის გამოყენების ან/და დისკრიმინაციული ხასიათის კომენტარის გაკეთებისგან, რომელმაც შესაძლოა ეჭვქვეშ დააყენოს მისი სამსახურებრივი უფლებამოსილების მიუკერძოებლად და ობიექტურად განხორციელება.

აქვე საჯარო მოსამსახურე თავს იკავებს სამსახურებრივი მოვალეობის შესრულებისას ისეთი ქმედებებისგან, განცხადებებისაგან ან/და სოციალური აქტივობისგან, რომელმაც შესაძლოა, ეჭვქვეშ დააყენოს მის მიერ სამსახურებრივ მოვალეობათა ჯეროვანი შესრულება“, – ვკითხულობთ პეტიციის ტექსტში.

პეტიციას ხელს აწერს 19 ორგანიზაცია, ასევე, ხელს აწერენ სამოქალაქო აქტივისტები და მედიის წარმომადგენლები.

„დაუყოვნებლივ დაიწყოს დისციპლინური წარმოება საჯაროდ ჩადენილი და დღემდე მიმდინარე გადაცდომებისთვის“, – ნათქვამია პეტიციაში.

__________________

ამავე თემაზე:

ჩემი პირადი ტრაგედია დაცინვის ობიექტად აქციეს – სამირა ბაირამოვა „ოცნების“ მხარდამჭერზე

გადაბეჭდვის წესი


ასევე: