სოფელ სარფში ხელვაჩაურის მუნიციპალიტეტის გამგებლის წარმომადგენლის თემურ კაკაბაძის ინფორმაციით, ამ დროისთვის სარფის მიმართულებით საავტომობილო მაგისტრალი გაიხსნა და ავტომობილების მოძრაობა აღდგა.
14 აპრილს, ღამით, სარფის შესასვლელთან ავტომაგისტრალზე მეწყერი ჩამოწვა. „მიწის დიდი მასა ჩამოიშალა [ასეთი რამ ზუსტად ამ ადგილზე ადრეც მოხდა]. მთელი ღამის განმავლობაში მუშაობდა სამაშველო ბრიგადები და სპეცტექნიკა. გზა გახსნილია და მიწის მასის კვლავ ჩამოწოლის საშიშროება არ არსებობს,“ – განაცხადა თემურ კაკაბაძემ. მისივე თქმით, შემთხვევის დროს არავინ დაშავებულა.
კვარიათი-სარფის მონაკვეთში ქვის ცვენისა და მიწის მასის ჩამოწოლის საშიშროება ყოველთვის იყო, ამიტომ აქ მესამე წელია მიმდინარეობს გზის დამცავი [ნაპირგამაგრება, ქვის ცვენისგან დაცვა და სხვ.] სამუშაოები. სამუშაოებს სახელმწიფო სამშენებლო კომპანია ახორციელებს. იმ ადგილზე კი, სადაც წუხელ მეწყერი ჩამოწვა, კლდეზე სპეციალური ლითონის ბადე იყო აკრული.
„ეს ბადე ძირითადად კლდიდან დაგორებული ქვებისგან იცავს მაგისტრალს. დღეს კი, გამთენიისას, დაახლოებით 4-ის ნახევარზე, მთელი მასა მოწყდა. თითქმის 3 000 კუბ/მ მიწის მასა ჩამოწვა მაგისტრალზე. ჩვენი ინფორმაციით ასეთი საშიში ადგილები მაგისტრალის გასწვრივ აღარ არის, თუმცა საგზაო დეპარტამენტი გეოლოგებს მოიყვანს და შეისწავლიან ტერიტორიას,“ – განაცხადა „ბათუმელებთან“ სახელმწიფო სამშენებლო კომპანიის სამუშაოთა მწარმოებელმა მალხაზ ლომსაძემ.
