დიდი ბრიტანეთის თავდაცვის ინფორმაციით, რუსეთი განაგრძობს ხომალდსაწინააღმდეგო რაკეტების გამოყენებას სახმელეთო სამიზნეებისთვის, სავარაუდოდ, უფრო თანამედროვე, ზუსტი მიზნის მქონე, შეიარაღების ნაკლებობის გამო.
„CCTV ვიდეომასალების ანალიზი აჩვენებს, რომ რაკეტა, რომელიც კრემენჩუგის სავაჭრო ცენტრს 27 ივნისს დაეცა იყო Kh 32. ეს არის საბჭოთა ეპოქის Kh 22 KITCHEN-ის გაუმჯობესებული ვერსია“ – წერს უწყება 2 ივლისის რელიზში.
დიდი ბრიტანეთის დაზვერვა მიუთითებს, რომ მართალია Kh 32 Kh 22-თან შედარებით გაუმჯობესებულია, ის მაინც არ არის განკუთვნილი სახმელეთო სამიზნეებზე ზუსტი დარტყებისთვის, განსაკუთრებით ქალაქის პირობებში. ეს კი, დასახლებულ პუნტქებში გამოყენებისას, მნიშნელოვნად ზრდის შემთხვევითი ზიანის ალბათობას.
„30 ივნისს, ოდესის ოლქზე სარაკეტო დარტყმებისას, რუსეთმა სავარაუდოდ Kh-22 KITCHEN რაკეტები გამოიყენა. ეს შეიარაღება კიდევ უფრო არაზუსტია და ბოლო კვირების განმავლობაში, უკვე არაერთხელ გამოიწვია მსხვერპლი მშვიდობიან მოსახლეობაში,“ – აღნიშნავს დაზვერვა.
რაც შეეხება უშუალო საბრძოლო მოქმედებებს დონბასში, დაზვერვის ცნობით, რუსეთის ძალები უმნიშვნელო წარმატებებს აღწევენ ლისიჩანსკისთვის ბრძოლებში, ავიაციისა და არტილერიის დახმარებით, მაშინ როდესაც უკრაინის არმია აკავებს მათ წინსვლას ქალაქის სამხრეთ-აღმოსავლეთ ნაწილში.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. 1 ივლისის რელიზში უწყება აღნიშნავდა, რომ კუნძული ზმეინი რუსეთმა არა „კეთილი ნების“, არამედ უკრაინელთა ინტენსიური თავდასხმების გამო დატოვა.
