CNN-ის ინფორმაციით, სავარაუდოდ, რუსების მიერ უკრაინაში მოპარული ხორბლით დატვირთული რუსეთის დროშის ქვეშ მცურავი ერთ-ერთი გადამზიდი გემი – „მატროსი პოზინიჩი“ სირიის ქალაქ ლატაკიაში შევიდა. როგორც გამოცემა წერს, ეს ამ გემის მეორე მოგზაურობაა ბოლო ოთხი კვირის განმავლობაში. ერთჯერადად გემს დაახლოებით 30 000 მეტრული ტონის ტვირთის გადატანა შეუძლია.
„მატროსი პოზინიჩი“ 19 მაისს ყირიმში, სევასტოპოლის პორტში, ხორბლით დატვირთვისას Maxar Technologies-ის სატელიტურ სურათებზე დაფიქსირდა. როგორც CNN-ი წერს, ფოტოებზე ჩანდა, თუ როგორ იტვირთებოდა იგი, სავარაუდოდ, რუსების მიერ უკრაინაში მოპარული ხორბლით. ამჯერად, გამოცემა წერს, რომ „მატროსი პოზინიჩის“ ლატიკიის პორტში ყოფნის ამსახველი ახალი სატელიტური სურათები 27 მაისით თარიღდება.
გარდა ამ გემისა, სევასტოპოლის პორტში ასევე დაფიქსირდა რუსეთის დროშის ქვეშ მცურავი მეორე გადამზიდი ხომალდი „მატროსი კოშკა“. ამ დროისთვის მის მდებარეობაზე ინფორმაცია არ ვრცელდება.
უკრაინის მთავრობის წარმომადგენლების განცხადებით, ომის დაწყების შემდეგ რუსებმა უკრაინიდან 400 000 ტონა ხორბალი მოიპარეს და გაიტანეს.
რუსეთი ბლოკავს უკრაინის პორტებს, რომელთა მეშვეობითაც უკრაინული ხორბალი შავი ზღვის გავლით გადის ექსპორტზე. უკრაინა ხორბლის მეხუთე, ხოლო სიმინდის მეოთხე – უდიდესი ექსპორტიორია მსოფლიოში. რუსეთსა და უკრაინიდან გადატანილი ხორბალი კი, გლობალური ბაზრის 30%-ს შეადგენდა ომამდე.
აღნიშნული გარემოებები უკვე გახდა სურსათის გლობალური კრიზისის შიშის საფუძველი საერთაშორისო საზოგადოებისთვის.
__________________
ამავე თემაზე წაიკითხეთ:
ყირიმის პორტში რუსული გემები უკრაინიდან მოპარული ხორბლით დაიტვირთა – CNN
